هلا يا سمران حياك الله كيف حالك عساك بخير سعداء بتواجد
سؤالك تقول الشاعر زايد وهذا مع احترامي لقبيلة سفيان ما هوب شاعرهذا شخص غير متزن وعنده محاولات شعريه بسيطه يقولها عند ربعه وقابلني وانا لا اعرفه اطلاقا في قصر الغمير في الطائف عند قبيلة هذيل انا والشاعر عمر الخالدي ومجموعة شعراء وعند النهايه حوالي الساعه الثانيه صباحا عندما اوشكنا على الانتهاء جاءني زميلي عمر وقال فيه شخص انا محرج منه من اول الليل ومنعت اصحاب الحفله من مشاركته فلو تكرمت تقول معه لو بيتين وفعلا وافقت وبدا هو ومن البيت الثالث هجم على قبيلة عتيبه بكلام انا اخجل الان اقوله لك فما كان عندي وسيلة تخارج الا ارد عليه بالمثل لانه سب له قبيله عزيزه وتمتد من البحر الاحمر الى الخليج منهم الحاضر معي ومنهم الغائب وانا امثلهم ولو سبني انا شخصيا لانسحبت بعد ذلك ما وجد وسيلة دفاع الا المشاجره وبدأها فعلا معي ورديت عليه بالمثل وانتهت المشكله وهذا اللي صار الشعر ليس وسيلة سب وشتم الشعر ديوان العرب والشعر سلاح ذو حدين ولا يتقن لعبته الا شاطر ولكن اغلب الناس مثل هذا وامثاله لا يعرف من الشعر حتى اسمه تحتي لك |
شفق
اهلا وسهلا وجودك يابو مهنا مكسبواسئلتك جاده شكرا لك وشكرا لحضورك وشكرا لذوقك وشكرا لاسلوبك العذب المغتره يابو مهنا جاوبت عنها في سؤال سابق وسوف اضيف على اجابتي هنا قصتي مع الزلامي الامير فيصل الله يطول في عمره عندما قبلني مشاركا في المغتره قال بشرط احطه في المطحنه واشوف لانه ما يعرفني وانا لاول مره اشارك امامه حينها تفاجا حبيب وقال اي مطحنه طال عمرك قال رشيد الزلامي وبعدها زهم رشيد الزلامي وقال له تبدا انت طبعا رشيد الزلامي يعرف هدف الامير وكان برضه في موقف احرج من موقفي لانه يعزني كثيرا ويشجعني من بداياتي المهم اخبروني قالو بعد خلف بن هذال وحيبي انت ورشيد ولا اخفيك يابو مهنا انني قعدت ارتجف من الخوف رشيد الزلامي ما هو اول مره اقابله بل يجي بيني وبينه معارك طاحنه اخرها قبل المغتره بثلاث ليالي ولكن المشكله انني الان في امتحان الله لا يمتحنا فاما اثبت وجودي والا انتهيت من الساحه الشعبيه بكاملها قبل المحاوره بدقائق يقول لي ناصر النفيعي اخذ المسبحه يا بو ريان واقول لالا معي قلم:) مدري من وين جبتها المهم بدا رشيد وقال الله يعينك يا فهد يابن نعيم && فالليله اللي كلها برد ومطر يعني هذا انذار يقول رحت فيها ليل ومطر ورشيد الزلامي انا بغيت اذبحك مير الله كريم %% يمكن يجيك العفو من وال الامر على الفور قلت يالله يا والي ياريف يا رحيم $$ عز الله اني طحت في علة نحر ما انته بذابحني وانا قدمك خصيم $$ عندي خبر ياللي معك علم وخبر بعدها ضحك الامير كثيرا وضحكو الناس ولتفت الانظار يمنا واستمرت المحاوره ساعه ونصف الساعه لين قال الامير خلاص رحت وسلمت على سموه وشكرني وبعد شهرين زرته انا وحبيب نسلم عليه وجاء المجال وقال عز الله انك تخارجت من الزلامي قلت صدفه يا طويل العمر قال لالالا الشعر ما فيه صدفه يا ابيض يا اسود شفق الله يدوخك انت واسئلتك هذي اسئله والا تحقيق فدرالي الاجابه الثانيه المنطقه الشرقيه جاوبت عنها سابقا على سؤال محمد الكرشمي يا بو مهنا الاجابه اثالثه ايه محمد القحطاني هذا شاعر قابلته في ابها هذا الصيف وقابلته في حفلة الشاعر محمد بن مشيط وهذا الشاعر من الشعراء الشباب الذين سوف يصير لهم شان عظيم في الساحه اعجبني اسلوبه وطرحه للشعر وطريقة تعامله مع منهم اكبر منه اتمنى له التوفيق الاجابه الرابعه كلمة شاعر شاب اعتقد انني تعديت مرحلتها بكثير انا خدمت في الساحه 14 سنه متواصله وكلمة شاعر شاب او نجم ما فيها شي ولكن بحكم تواجدي المستمر حتى في الاعلام لا تنطبق علي ولا تزعجني ابدا انا ما زلت شاب وتقول 33 ثلاث وثلاثين سنه بس تصرح على كيفك يا شفق نقص ثلاث سنوات يا اخي لا حول ولا قوة الا بالله شاو |
سليمان بن سالم
هلا وسهلا الشاعر اللي ذكرته هو عبيدالله المجيرشي وليس عبدالله المطرفي والمحاوره هذه بيني وبينه لاول مره ازور الطائف ولاول مره اقابل المجيرشي والصراحه انها قويه جدا ولا يحضرني منها يا سليمان الا بيتين وان شاء الله اني انزلها كامله في المرقاب وهي موجوده في مكتب القصير انا ليا حولت بي فالمخاطر دستها دوس ^^ يوم انت ترعد وتبرق يا سحاب بلا رشاشي من خلقت الناس والكرعان ما تحسب كما الروس%% يا شاعر هذيل يا ويلك على صف النواشي المحاوره طبعا طويله وغيرها محاريف اخرى كثيره اما بالنسبه لسوطه فهم محبوبين للجميع وشلون انا الذي منهم وهم مني وعلاقتي بهم علاقه طيبه وبالذات النواشي اهل فن واهل ذوق واهل شعر واهل كرم واهل رفقه ولا اخفيك انني افتخر بهم كل الافتخار هل نسيت اهم هم الوحيدون من القبايل الذين يطلق عليهم الصفوف الدوليه اما مشاركاتي في الطائف هذا الصيف فانا شاركت ولكن مشاركاتي قليله يمكن ثلاث حفلات لانني هذا الصيف اغلب حفلاتي متفرقه في المملكه والشي الثاني ما هو على كيفي الدعوه هي التي تحكمني اينما كانت تحيتي لك |
هلا ومرحبا يا داهم
كيف الحال وجعلك بخير المحاوره فن عريق ويتطرق لكل المواضيع التوعويه والترفيهيه والسياسيه والاجتماعيه ولو لاحظت ان شعر المحاوره هو الاقرب للناس في شتى المجالات ويعالج قضايا كثيره تحيتي لك |
هلا يا عايش
سبقك سمران على الاسئله وتجد هناك ردي على السؤالين معا اما حيبي فانا قلتله خايف اشبها وتموت حرا %% وانت لو مت يا حبيب خساره حبيب رده علي يقصد (حبيب خساره) اخذها على هذا المعنى فقال البناخي مع الخال يتجرا && والخساره ركوبه في الغماره |
فهد العازمي
اولا كلمة حق انك من الشعار الشباب الذين نطرب لشعرهم فالقلطه والذين نتوقع لهم مستقبل كبير ان شاء الله ليصبح في مصاف الكبار ان لم يكن الان هو في مصافهم سؤالي 1 حضرت لك محاوره مع الشاعر زيد المطيري وكانت في قصر الاندلس فالرياض ان لم تخني الذاكره وكان الشاعر زيد المطيري منفعل في تلك الليله واعجبني ثباتك وردودك القويه هل هناك سوء تفاهم بينكم سابق ولماذا هذا الانفعال من زيد ؟؟؟؟؟؟ 2 رأينا فالسابق ان بعض شعار القلطه يلبون الدعوه الشخصيه وخاصه اذا كانت قريبه من سكن الشاعر تقدير لمكانة هذا الداعي وما نلاحظه حاليا اختفاء هذه الظاهره الكريمه ماهي الاسباب 3ذكرت بعض الاسماء وأغفلت بعض الاسماء من شعار المرقاب للمحاوره وخاصه من وجهة نظري ان سداح لايقل شأن عن الاسماء اللتي ذكرتها لاأعجابي بمحاوراته وقوة معانيه وغيره على سبيل المثال حامد البراق هل لنا معرفة السبب ؟؟؟؟؟؟؟ |
الشاعر الرائع فهد العازمي
اسعد الله اوقاتك لدي سؤالين الاول بخصوص لغز نشر لك قبل فتره في مجلة قطوف وكان حله مدينة البندقيه في ايطاليا وقد حله الشاعر الكبير رشيد الزلامي سؤالي هل لك ان تحدثنا عن كيفية كتابة هذا اللغز خصوصا وانك اشتهرت كشاعر محاوره وليس ككاتب الغاز الثاني في ظل التطور المرحلي لما نعايشه في الساحه الشعبيه وخصوصاً ساحة المحاوره هل تنظر الى نصف الكأس الممتلي ام تنظر الى النصف الفارغ تحياتي لك ولي عوده |
فار س العصيمي
هلا وسهلا يا بو مقبل من العايدين كل سنه وانت طيب وشلون الربع عساهم بخير الاجابه الاولى والله لو قلت لك يا بو مقبل ان الشعر ما هو مطلب مادي فانا ابي اكون عرضة للنقد والمجامله فعلا الشعر الان اصبح مادي للشعراء وهم اجدر به من غيرهم اذا كنت شاعر موهوب ومبدع وتخسر وقتك وصحتك وتبعد عن اولادك ومصالحك الخاصه والعامه وتمتع الناس الذينا دعوك برغبتهم فلماذا لا تستحق المبلغ المادي كثير ولا قليل لكن انا معك في نقطه ثانيه وملفته للنظر وهي سبب تحويل الشعر الى مطلب مادي وهي اتجاه الناس او اغلب اناس للشعر لطلب الماده فقط وهذا في اعتقادي بل اجزم انه سلبي بالنسبه لللشعر انت هنا جيت تدور فلوس ما جيت على انك عندك موهبه تريد تنميها وهي البنيه الاساسيه للشاعر معناته ان الشعر في وادي وانت في وادي حطيت في بالك الماده وتبغى تجي شاعر بالغصب الاجابه الثانيه والله الشعراء ماهم واحد وانا اقول معك حق في الاونه الاخيره لوحظ ما ذكرت ولكن ما يعم الجميع الشعراء عشره انفار الان على الساحه فقط والباقي لا ينتمي للشعر بصله يشتم ولا بكيفه ما يظر ايام ويختفي يسبون شاعر بأتفاق :) والله اول مره اسمعها يا بو مقبل المثل يقول الكلام مضاريع يعني يصلح على كل وجه الكلمه تقدر تحللها عللى الف معنى وبعض الجماهير يضن ان المقصود فلان من الناس وهذا غير صحيح الاجابه الثالثه مضاربات بأيعاز من الشعراء يا اخي منهم الشعراء هذولا يلعبون كوره هم ما تصدق انني عانيت كثيرا وعانو الشعراء كلهم من هذه المشكله وهي ردع بعض الناس المتحمسين والذينا تنقصهم بعض الامور مثل ما تعرف الى درجة اني الغي بعض الحفلات تلافيا لبعض المشاكل من بعض الناس فلا اعتقد ان احد من الشعراء يفعل كذا الصفوف او بعض الفئات من الجمهور يمكن الاجابه الرابعه اذا افتخر الشاعر بقبيلته فهذا من حقه ولكن بعقلانيه ومنطق اما تاليف قلوب الناس او الجماهير زي ما قلت فهذا موجود والحمد لله كلنا اخوان وكل الشعب السعودي اسره وحده قد يحدث امور فيها اختلافات في الارياء او اثارات تنافسيه شريفه وهذه في اعتقادي لا تظر تحيتي لك يا بو مقبل |
الاخت عندل
هلا وسهلا كل عام وانتي بخير سؤالك تقولين العنصريه والله ما ادري وش تقصدين بالعنصريه يعني انا سبق وان قلت كل الشعراء عتبان:) ما اذكر اني قلت هذا واذا قلت هذا فانا مجنون مع احترامي لي :) حلوه هذي المهم يا عزيزتي كل فيه حقه من الناس واذا ذكرت اسماء فهذه الاسماء جديره بالذكر سواء من قبيلتنا او من القبايل الاخرى وهذه وجهة نظر شخصيه فيه من يعارضها وفيه من ييدها شكرا لك واذا فيه عندك توضيح اكثر للسؤال انا مستعد تحياتي |
سداح
اولا احييك وكل عام وانت بخير واشكرك على هذا الاطراء ولو كنت لا استحقه ولكن هذا من وفائك وذوقك اما الاجابه الاولى فهي سلطان الهاجري شاعر لايشق له غبار وانا واحد من المعجبين به شخصيا وبشعره ولا يحتاج شهاده شاعر كبير بكل ما تعنيه هذه الكلمه من معنى اضف على ذلك انه رجل قليل نوعه في الرجال لما يتمتع به من اخلاق واخلاص وكرم وطيب اصل وعلاقتي به علاقة اخو بأ خيه وبيني وبينه زماله ورفقه من زمان طويل ولا اكن له الا كل الاحترام والتقدير وهذا الاسلوب طبيعي بالذات مع سلطان الهاجري وهو يتقبله بصدر رحب ويليقبه لانه ما يلحقه شك وانا قلت له هذا من باب المزاح وهدفي تحريك الجمهور وحماسهم وهو يعرف ذلك والله ماهي من قلبي ولكن قبل هذا قال له رشيد سلطان عنده قضيه مع رجال المرور %% واكبر مصيبه يواجهها حزام الامان مدري حضرت هذا ولا لا وعنما غيرت انا قال لي سلطان يا فهد الزلامي ما خلا لي نفس وتعبت والله ما اقدر العب نهائيا وابي اسري وهو صادق في كلامه وواصلت انا اربعه ابيات لان الجمهور عيا ورفض تغيير القاف واصلت ارضاءا للجمهور لين رد علي الشاعر مساعد عمر السبيعي وستمرينا ولا فيه اي مشكل الليله اللي بعدها انا وسلطان في جهام عند الجماعه ومعنا حبيب ومستور والليله اللي بعدها في الدوادمي وهكذا اما سالفة انها لا تحسبلي يا سداح صدقني ما فيها شي هذي ملاحه ومداعبه من اللسان لا فيها شتم ولا تعدت حدود الادب وسلطان نفسه كان يضحك منها تحياتي لك واحترامي وتقديري واعجابي |
هلا يا عندل مره ثانيه
صدقيني مالي يد في هذا كله اذا كان مثل ما تقولين ولا اعتقد انه حصل وانا بدوري احيل هذا السؤال لمجلة المختلف وجريدة اليوم وعند جهينه الخبر اليقين تحياتي واعجابي لك |
هلا وسهلا اخوي محمد الدهيمي
ويسعدني ويشرفني انك احد جمهوري العزيز على قلبي واشكرك جزيل الشكر على اطرائك ومحبتك لي احبك الله اما بخصوص سؤالك وهو شاب لديه مقدره وموهبه وتريد نصائحي له اقول ... اولا التوفيق من الله فاذا ما وفقه الله لا تنفعه نصائحي لا انا ولا غيري بعد توفيق الله عز وجل انصحه ان يمشي خطوه خطوه هذا اهم نقطه ويمارس منهم اكبر منه مستوا ويحترمهم وياخذ بنصائحهم والشعراء كثيرين لا استطيع ان اقول فلان من الناس ولكن الاجتهاد مطلوب والمثابره ويعتمد على الله ثم على نفسه لا يكفيه انه يلعب مع محمد او مع فهد او زيد او عبيد من الناس تحيتي لك يا محمد واشكر جزيل الشكر واسلم وسلم لي على من تحب |
داهم العصيمي
مرحبابك لو قلت لك القابله فيه مباراه بين المنتخب ومنتخب ثاني والدخول بخمسين ريال تجي الجواب طبعا بنعم طيب لو قلت لك فيه حفله هنا في احدى الفنادق يحييها الفنان محمد عبده والدخول 100 تجي طبعا تبي تجي طيب لو قلت لك فيه حفله يحييها حبيب مستور صياف رشيد سلطان فيصل جارالله ابو مشعاب والدخول 200 ريال تجي طبعا تجي لا وتجي من العصر ولو قالو لك بألف ريال جيت ويش معنى هذا معنى هذا ان المحاوره فن من الفنون السائده في المملكه ومعناه كمان انها وصلت الى اعلى مستوا وتطور فلماذا هذا التجني على موروثنا خلوه يتطور ياخوي ليش تعرقلونه اترك الماده ماهيب شي ثم انا ما عمري يوم من الايام قريت واحد يقول لماذا النوادي تاخذ تذاكر او حفلات الفنانين بينما الشعر الشعبي مجني عليه حتى من اهله لا حول ولا قوة الا بالله الفلوس اليوم هي كل شي واذا كان اخذ تلك الفلوس منه منفعه لموروثنا فليش لا وجهة نظري انا اقول ما فيها شي ولو اعيدة تلك الحفلات ودعيت انا لها شخصيا وطلب مني دفع تذكره دفعتها دبل وعشرين دبل تحيتي لك |
الرائع / فهد العازمي
أنت شاعر غني عن التعريف ولاجدال في ذلك سؤالي : أنا من المتابعين لقصائدك والتي أعتبرها (( درر )) ومن أشد المعجبين بهاويغريني اسمك لقراءة كل ماأجده لكسواء من خلال الصحافة أو المنتديات ومع هذا أشعر أن شعر المحاورة أخذك من شعر البدع هل لردة الفعل المباشرة دور في ذلك من خلال جمهور المحاورة ؟ أم أنك تميل لشعر المحاورة أكثر من البدع ؟ بالتوفيق . |
اسعد الله اوقاتكم بكل خير
الحقيقه ان جهود الاخ العزيز الشاعر / معيض العتيبي مشرقه ودائما يسعى للرقيّ بالافكار النيّره وهذي من طيّباته طاب حظه ..... استحدث هذه الزاويه للالتقاء بشعرائنا الافاضل عن قرب لنطّلع على مالا نعرفه عنهم وللاستفاده من تجاربهم وطرح الاسئله لنستنير بالاجوبه الشافيه واليوم اللقاء مع شاعر اثبت وجوده بشعر الديوان والميدان وهو الشاعر المخضرم / فهد بن نعيم العازمي وبلا شك انه من شعراء القبيله اللى نفتخر بهم وله بصمات واضحه مع فطاحلة شعراء الجزيره بالنسبه للاسئله الاخوان ماقصروا بس عندي ثلاث اسئله لم تطرق . وهي كالتالي : 1- انت شاعر بالنظم لايختلف عليك اثنين ولكن نراك مقل . هل المحاوره لها تاثير بذلك ؟ 2-ما رائك بالمساجلات الشعريه وهل لك مساجلات ومع من . من الشعراء ؟ 3-يقال ان شاعر المحاوره لايطلع للساحه الاّ بعد مايدخل مع بوابة شعراء عتيبه:) هل هذا صحيح ؟ ولماذا ؟ واسف للاطاله واتمنى لك التوفيق ولاهنت يامعيض ولكم تحياتي عمّـــان |
فهد....
قلت: ياصاحبي لاتواخذني بزلة === ترى عليك الثمانين محسوبة بيت بقي في ذاكرة الكثيرين...ماذا يعني لك هذا البيت هذا اولا .. ثانيا: هل من الممكن ان نراه قصيدة مكتملة؟؟؟ سؤال آخر... هل سبق لك المشاركة في حفلات خارج الوطن؟؟ واذا كانت الاجابة نعم...متى وأين؟؟ تحياتي لك يبو ريان |
الشاعر فهد
اشكر الاخ معيض على هذ ا الاختيار الموفق ولدي بعض الاسئلة اتمنى الاجابة عليها 1- بصفتك ريس القسم الشعبي مااابرز الاسماء الشعرية هنا فالمرقاب 2- بصفتك شاعر محاورة مااابرز الاسماء من وجهتك نظرك فالمحاوره هنا فالمرقاب 3- ماحقيقة الخلاف بينك وبين سلطان الهاجري وشكرا للجميع |
عبدالمحسن بن فهد (بيداء)
هلا وسهلا نعم انا جاوبت على قد السؤال اللي طرح علي ولا فيه احراج ابدا هذه حقيقه ليش احراج قول الصحيح ولا عليك من احد وانا قلت في المرقاب نعم في المرقاب وكلهم اعضاء هؤلا الاسماء اللي انا ذكرت واعلم ان فيه اسماء جديره بالذكر هنا وموجوده معنا ولكن تلك الاسماء معروفه في الساحه يعني عرفناها في الساحه قبل الانترنت واللي تكلمت عنهم عرفناهم شعراء محاوره في النت اما الاسماء الباقيه فهي معروفه اساسا ولا تحتاج الى ذكر وهم على سبيل امثال سرحان الوذيناني شاعر قدير ومعروف الدعوجي شاعر محاوره ولو كنت لا اعرفه ولكن قريت له محاوره ممتازه جدا مع حبيب في حفله وحسب معلوماتي انه شاعر جيد هذه كانت اجابتي على قد السؤال وانا صادق شكرا لك |
سعود المسعودي
احييك واشكر ك من صميم قلبي واهني نفسي بأعجابك بي لا عدمتك طال عمرك نعم هذي الحفله في الاندلس مثل ما ذكرت قبل سنتين تقريبا وكان بيني وبين الزميل الشاعر القدير زيد المطيري سو تفاهم في تلك الليله لاسباب لا احب ذكرها الان وانتهت في وقتها وقبلها لم يكون بيني وبينه اي مشكله ولا بعدها طبعا زيد شاعر كبير واحترمه ويحترمني وبيننا زماله ورفقه قديمه اما تلبية الدعوات فهذه ظاهره حميده وانتهت مع الاسف وانا من الناس اللي لحقو عليها يمكن في اخرها وسبب اختفائها ما ل الشعراء فيه ذنب مثل ما تعرف دخلت الماده على الشعر وكثرة المكاتب ولا عاد عند الشاعر وقت يلبي الدعوه اللي تجيه بمصلحه يعني ما يلحق واذا لقا فراغ يا دوب يسترد النفس:) هذه الاسباب فقط اما عدم ذكري للشاعر الزميل سداح فهو ما هوب نسيان ولا تجاهل اللي اعرفه عن سداح انه شاعر في النظم وممتاز وقوي وله مشاركات وقصائد انا قريتها واعجبت بها وبه ولكن من ناحية المحاوره والله اني لا اعرف عنه شي واذا كان شاعر محاوره هذا من ما يسعدني وتاج راسي وحزامي يمكن قريت مشاركه بالصدفه هنا في المرقاب بسيطه وسبق وان قلت انني لا اتابع المحاورات المتقطعه ولا احبها الا بالصدفه فتحيتي لك وللشاعر سداح (حامد البراق) شكرا لكم |
اولا
كيف حالك يا اخ فهد ومن العايدين بعد الزحمه ثانيا انا من اشد المعجبين بك وبشعرك ولا اخفي عليك ادور محاوراتك واسريلها ثالثا قال رشيد الزلامي ماتت حليمه بس ما ماتت عقيم......... جابتلها خمسة عيال في شهر رد فهد انا احمد الله مابهم واحد غشيم........ لو انهم يا صاحبي خمسة عشر انا حضرت وانبسطت من الرد بس وش كان قصد الزلامي؟ كانت في حفلة المغتره وشكرا |
الف شكر للمرقاب............
الشاعر فهد نعيم ....اهلا بك في البداية ولدي سؤالين فقط: كم عدد الحفلات التي شاركت بها ولو تقريبيا؟؟ كثرة مكاتب تنسيق الحفلات هل لها اثر سلبي او ايجابي على شعر المحاورة او شعراؤها؟ |
الاول بخصوص لغز نشر لك قبل فتره في مجلة قطوف وكان حله مدينة البندقيه في ايطاليا وقد حله الشاعر الكبير رشيد الزلامي سؤالي هل لك ان تحدثنا عن كيفية كتابة هذا اللغز خصوصا وانك اشتهرت كشاعر محاوره وليس ككاتب الغاز
هلا يا زايد والله اللغز هذا كتبته في ذيك الايام وكيفية كتابته فكره طرتلي عن مدينة البندقيه وكان وقتها شاهدت برنامج عن نفس المدينه في قناة الجزيره اضن اسمه قاموس البلدان والله ماني متأكد من اسم البرنامج وموجود الى الان وكان قبل البرنامج بدقائق مكلمني الصحفي يبغى لغز وسويته في نفس اللحظه لغز عادي وغيري من الشعراء شاركو بالغاز مافيها غرابه وشعراء المحاوره هم الاقرب للالغاز يا عزيزي حبيب شارك بلغز ومستور ورشيد ومصلح وجارالله وكثيرين لماذا لا تستغرب منهم :) النصف الفارغ والنصف المليان :confused: |
| جميع الأوقات بتوقيت GMT +3. الساعة الآن 12:22 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية