المشاركة الأصلية كتبت بواسطة سداح

السلام عليكم ،

محاولة رثاء في ( جدّي ) الذي وافته المنيّه فجر أوّل أيام هذا الشهر الفضيل ، والحقيقه أنني أشعر بأني اول مرّه أكتب قصيده في حياتي لكن ارجو السموحه عن أيّ تقصير وأسأل الله ان يرحم جدّي ويسكنه فسيح جناته هو وسائر موتى المسلمين .




[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black"]
مواكب الحزن تمشي من مكان لمكان=الموت يقتادها .. والصبر يبرالها


تفتح صدور العباد ولا عليها ضمان=إليا تمثنت قلوب الناس تغتالها


يا مرسل التهنئه بالشـّمع والشمعدان=أرجوك كلّ التهاني قفّل إرسالها


مع خالص الشّكر والتقدير والإمتنان=مانيب ويـّا علوم ٍ جيت مشتالها


وشلون تنقز كذا .. يا هلال شهر رمضان=أستغفر الله من ( وشلون ) من قالها ؟


من يوم هلّيت هلّت يا الله المستعان=صواعق العلم فال الله ولا فالها


هزت كياني وخلـّتني بليـّا كيان=أجاهد الروح لين يهيد زلزالها


مع دخولك قبل نورك علينا يبان=والوف قلبي .. ونفسي وابري حالها


وأنا عيوني هزيله والمدامع سمان=يا لايمين العيون مصابها جالها


خلوني أربط على صدري حزام الأمان=وأدعوا لي الله يجير النفس من حالها


فقدت راس ٍ عزيز ومن طوال اليمان=قامت عليه المنيّه تطوي حبالها


فقدت وجه ٍ كريم وهيبة ٍ ما تهان =فقدت نفس ٍ تحوز المدح بخصالها


فقدت رجل المعالي ما ضرا بالطمان=فقدت نسل الكرام ومضرب أمثالها


فقدت تاريخ حافل من سجـّل الزمان=فقدت من سيرته بالطيب منزالها


وشلون أبرثيه وعشري عقب فقده ثمان=وقصيدتي عن فقيد الطيب يرثالها !


عسى المراجل بعد موته تجار وتعان=المرجله فاقده واحد من رجالها


هلّت عليه المنابر دمع .. مع كلّ آذان=إمام ربعه .. ومفتيها .. وخيـّالها


وتبكي عليه النخيل اليابسه والليان=والبن والهيل والدلـّه وفنجالها


ويبكي عليه الكرم عقب إنفلات العنان=راعيه يوم المكارم محتمي جالها


والشعر يبكي وينشد عن فصيح اللسان=ومساجلاته غشاها الحزن وأوما لها


فيه التـّقا والنـّقا والعقل والإتزان=والسيره الطاهره رامت له وطالها


عساه مرحوم يوم الحشر والإمتحان =ومجار في ساعة ٍ ما تامن اهوالها


في ظل ربه وينعم وسط خضر الجنان=يظلـّه برحمته ويعيش بظلالها


الله يغسله من ذنوبه ويبقـا مصان=ويعتق من النار يوم الخلق بأعمالها[/poem]


وسلمتوا ،،