هاه !!
 

السلام عليكم ورحمة الله


مبطي ما درست بعض المفردات والليله عندي تحليل وتفكيك وتفتيت لمفردة (( هاه ))


هذي مفرده صوتيّه مدري وش مصدرها اللغوي .. اعتقد انها مهيب عربيه الله اعلم انها مثل بس اذا تذكّرون موضوع بس .. قلنا لكم ان بس مفرده هنديّه هذي الله العالم انها بنغاليه !!


عموما حنّا يالعرب نكذب على عمارنا نقول ان حنا نخترع وياخذون الغرب منا وحنا نسرق البوهنّاد ومعشّين فيهم حتى ارقامنا 1 2 3 4 5 6 الخ الخ .. هنديّه

والارقام الانجليزيه حاليا ً اصلها عربي .. لكن بعد ما بحثت طلع العرب ماخذينها من الهنود بعد

والله ان الهنود مهم بسهلين ,,


عموما نرجع لمحور حديثنا وهو - هاه -



هاه هذي لها استخدامات كثيره جدا ً جدا ً ..


مثل ..

تجي اجابة نداء مثل لو يدعيك واحد ولا انت بحاسب ٍ به اذا قال يا فلان تقول : هاه !!

واذا دعاك واحد وهو دابل ٍ كبدك والا مزعجك ترد بنفس الطريقه بس تمغطها شوي وترفع الصوت فتقول : هاااااااااااااااااااااه :(

وتجي وش سويّت ؟؟ .. مثل لو به واحد راح يخلّص لك موضوع عند مدير والا عند اي احد ولاتدري وش صار اول ما يجي تقول له .. هاه ؟؟


وتجي .. شفــت او قد قلت لك او هذا ما سبق وان تحدثنا به !! .. مثل لو قلت لواحد يا ولد انتبه تروح لفلان وتقوله كذا وكذا تراه بيسوي كذا وكذا .. وراح المقرود وصار اللي قلت له .. اذا جا ونشدته وش علومك ؟؟ قال مثل ما قلت لي .. طبعا ً انت بدورك بتقول له .. هاه !! بس بنبرة صوت غير الهاهات السابقه هذي فيها شي من الغطرسه يعني تراني اعرف ,,


وتجي هاك .. مثل انت جبت سندويش لك وللشباب وقمت توزع السندويش على الشباب وفيه واحد تمد له ولا هوب صوبك يسولف فتقول له هاه هاه !! طبعا النبرة هنا يكون فيها شي من رفعة الضغط اللي ما بعد تعدت حدها لكن ابو الشباب بدا يدبل كبدك ,,


وتجي مثل البخ !! .. لما واحد يبي يسولف بسالفة وانت خابر انه بيجيب العيد فتقول له هااااااااااااااه !!

وتجي ادخل داخل .. هذي للبزران اذا فيه بزر كل شوي ناقز للشارع اول ما يطلع مع الباب تقول له هااااااه يرجع طوّالي !!


وتجي واصل .. مثل لما احد يسولف لك وانت مركز معه كل ما وقف ياخذ نسم تقوله هاه ؟؟


وتجي احيانا كثيره عند الكثير من الشباب لما يسولفون الناس وتنتهي السالفه وفيه واحد مهوب مركز معهم بعد ما يبدا ينتبه ان الناس يسولفون يقول هاااااااااااااااااه ؟؟ يعني ويــش ؟؟


ولها ايضا ً استخدامات اخرى لكن هذا اللي طرى لي ..



الى اللقاء مع مفرده جديده ان شاء الله :)

وتجي بمعنى سووّ كذا .. أي بهذه الطريقه :)


يعني لما واحد يسويله شغله انت شارحها له ولا يعرف يسويها ويجيبها لك ويقول لك يا رجال ذي كيف تصير ؟؟.. تاخذها منه واثناء تأديّتك لمراحل العمليه تقول مع كل حركه هاه بعدين هاه بعدين هاااه < المرحله الاخيره بمده بسيطه :)


حب لي خشمك .. على هالطلعات العجيبه

مع انك الان معذور تعيش فراغ كبير :)

بس بجد

ابداع يا ابو عبــّود .. :)

ياسلام :)
طيب عندي (هاه) بعد .. بس مضاف لها حرف هاء زائد بحيث تكون ( هاهه ) !!



وهي تجي كالآتي :-

يعني تجي يوم من الايام وتعزم لك واحد على كرامه ( عشا والا غدا ) وانت منت بصامل ومتوقع انه ما راح يوافق بس تعزمه من باب فرد العضلات واثبات الوجود
وتبدا بالكلام المليء بالمفردات المستهيطه من كتاب ( هايط واضرب براسك الحايط :( )
وتقول للضيف :-
يابو فلان انت غالي ولك حقٍ على الجميع وانا دايم اعزمك وتقول بعدين
والحين يابو فلان الغدا والا العشا وطالبك انك تقول تم !!
اذا فاجئك ابو فلان وقال : تم تم وعساك على القوه
عندها اعرف انك لا ارادياً راح تقول : هاااااااااااااااااااهه :( ---> طبعاً بمد الزقم وارخاء البرطم !!


الله الله .. وعفاك


تحياتي لك يا ابا عبدالله
ولـ هذا الدرس المفيد جدا :)



سلام

مشالله عليك صاير مدقق لغوي أبوعبّود هاه؟:)

لاهنت وذا المواضيع بنشوف واجد منها خلال الشهر وثلث الجايه

:):):)

ياخي الأبداع ماله حدود ،، هاه :)



صح مخك يامبارك على الأستغراق اللغوي :)




تحياتي / حامد

هذي نتايج الفراغ الوقتي :) ---------> بناء على كلام ابو جارالله .. اللي عقبال مانشوف عنده فراغ وقتي :thumb:

!
!

إسمع يا سمو الشيخ طال عمركـ

هاه

تجي بمعنى كمّل .. يعني إذا واحد يسولف له على واحد .. واندمج معه في السالفه لازم يقول هاه

مثل :- تقول ومشينا ويوم طلعنا مع هاك الطعس ... يجيك المستعجل اللي تسولف عليه ويقول هاه .. :)


وكذلك هي من علامات ( المفهين ) :n3san: الله يعافيهم ولا يبلانا .. وهذا ودّك إذا قالها تحمّى له ثم تصوعه .

مثل .. تقوله كلام ثم يقول : هاه .. وإذا عدته يقول هاه :(

وفي رواية إخرى .. تستخدم بمعنى .. إعترف إحسن لك لكن بإسلوب تهكمي رهيب :) ولازم تمد فيها شوي وتكون بشكل رقيق :) هااااااااه



تحياتي .. لك

يعني المشكله فالفراغ الوقتي ؟؟؟؟؟


هاه


:m5: طيب طيب <<<<< مندمج مع السالفه فغط ;)


لاهنت ياكبتن نائب ابو ابومبارك :)

وعليكم السلام والرحمه والاكرام ..


وش الفراغ اللي يقولونه الجماعه ؟


رجل جامعي ولاتعرف تكمل الفراغ ؟!!!
<- حدر الوادي



طيّب ياراعي الاس تن تاجات ..


مسوي لي فيها مبتكر ... هـــااااه :(



أنا أزيدك (هـاه)
وه

هااه
أثرك عزوبي ، وأنا أقول ماهي من عادتك إنزال المواضيع
teeth:

شوف انت ويّاه ردّوا على الموضوع او سووا مثل ابو جوجو شوفوا شلون جاب سالفة هاه وهاه وهااااااااه مع انه اول من بدا سالفة الفراغ :( :(

والا شوفوا الحصيّن وهاهه :) :) :) :) :)

والاناصر تراحيب مع انه ماخذ من موضوعي بس ما عليه فكّر شوي

اما انتوا يالباقين جايين تعلقون :(



طرّاه التعليق ؟؟

عبدربه .. ياخي بلا استع با طات امش معنا صح نمشي معك زي الحلاوه .. اوكي ؟؟

معذرةً ياسيادة النائب المخضرم ، على عدم إكمال الرد ,,,

وذلك لظروف مقهاويه !


اسمع اللي يهبي الشاطان وان وصلنا ؟


ايه


أقولك تجي هاه بمعنى آخر ، كأن تقول خلاااااص أو اتفقنا ؟

مثل أن تطلب من راعي المطبخ يحط الذبيحه مفطحه !

تقول اباها مفطحه ست ضلوووع هـااااه ؟

ويقولك هو أيوا أو اوكي سديق أو مافش مشاكل إذا كان مصري ..




وتجي بمعنى استفهام غاضب :(

تقول لواحدٍ بانك وبانه شئ ، وهو ماشاف غيرك ..


تقول له :
أنت مانويت تجنّب عني ؟ هـــاااااااااااااه :( :(


..

وتجي واصل .. مثل لما احد يسولف لك وانت مركز معه كل ما وقف ياخذ نسم تقوله هاه ؟؟
الاستخدام آنف الذكر فاقعً كبدي ابه واحدٍ غالٍ علي



هاااه من استخداماتها ايضاً استخدام شبيه بماقاله الحصين
لاعزمت واحد وقعدت تحاول فيه وانت منت بصامل وهو يكنكن يباك تلزّم تقول هاااه وش قلت تم.. قل تم يارجاّال


مشاركه غلاااااااا هاااااه

هاه من داق بيجر ؟

:)

ياولد وش ذالمواضيع اللي ما حصلتش

انا بس عندي اضافه وحده
وهي اضافة على ما قال ابو نجد في كلمة :




هاهه

و هي تجي بمعنى : أحسن

يعني على سبيل المثال :
انت و واحد ثاني تشتغلون في احجة تصلحونها
و تقول له يابن الحلال لا تسوي بها كذا هم تكسرها و هو ما يسمه الكلام و تقول له مره ثانيه يابن الحلااااااااااال لا تكسرها و هو يقول بها الا وهي منكسره قلت انت : هاااااااااااااااااهه

يعني احسن اني معلمك
اقول يابو عبيد

ارب الفراغ ما يطوّل بس :(

هاه وذاااااك ;)
والله مدري وش طرا علي لكن الحقيقه يابو عبدالله ان هاه هذي غير شكل :)

ويمكن ان لي عوده

لاهنت يامبارك آل خليفه

مع أجمل تحيه

أخوك

هااااه وش عندكم هنا ! :)


:



الهاه .. أحلى أستخدام وأحلى كلمه تلقائيه تمر على المسمع

محبتي وتحيتي يا ابوعبيّد :)

على مبارك الطلاق اني داري انك بتجيبها
teeth:


لانك دابلني في سبدي بها

,,


مبارك :)

فيه استخدام جديد بعد

هو مثلا ,,

اذا شفت لك سيارتين تصادمن في لاحظت اصطدامها
تقووول هاااه بس بشكل سريع

:)teeth:

ارحب يابوعبدالله



ويش ذا الفراغ اللي انت فيه


وانا ادري انك رجالٍ مليان ويش ذا الفراغ اللي انت في هااه



المهم في استخدام ثاني بعد


مثلا في سيلره مدحتره ولا فيها سواق وانت تشوفها بس بعيدٍ عنها ولا تقدر تسوي شي ولا انت بقادر تسوي الا وانت مكانك تقول هاه هاه هاه هاه هاه واليا اصدمت تقول هاااااه مثل هاااهت الحصين :)


ويمكن عادني بعود سمعتني هاه

^
ههههههه أنت مجرم ، واجرامك بحق مبارك واضح !


..........


المهم على طاري الهاهات والهاه وأم الآه !


هذا توقيع ابن يحيى بغيته اوديه صوب التواقيع ولادريت إلا اني مودزّفٍ عندكم ..

اي قووول :
في برنامج مامـا نـور
لقحت عنز وجابت شاه !
بين الظاهر والمستـور
واحد هاه وواحد هـاه !


ههههههههههه يحايحا

ههههههههههه


تصدقون توني اقرا رد ابن قنيص

هاه وذاك ؟ سجيت منه :)

:
:
ههههههههههههههههه
(( هاه ))
كلمه ملكعه .. تقرأ من كل اتجاه (( هاه )) .. !!
أصلها (( هه )) التي تفيد (( الكركره )) والضحك ..
لكن أستقامت الـ (( الف )) في قلبها وجعلتها بأكثر من دلاله ..



لذا كثروا منها لأنها تقيكم شر (( التتنيحه )) مع اي ردة فعل تمر عليكم .. !!
مبارك .. كل الشكر لك .. !!


:)

مبارك انت واش تقول هاه ياوخوك مافهمت شي جلست اتهجى اللي انت كاتبه ويوم قربت افهم ولين


مشوط يقول عليك منادى قالت هاه قال هواه البل كسرة الحاض وغرت جهدي اردها يوم رجعت


وجيت ابا اقرى انعمست تدري انا اضنها نكته ابي اضحك ياخوك وسامحنى كانه غير


هههههههههههههههههههه


والا اقول ابي اعود اقرى من جديد يمكن افهم


حبي وتقديري لك ولحرفك الجميل