محاوره مع العملاق مستور العصيمي
 

مستورالعصيمي=
مرحبا واعداد ما بان نجم في سماه=في محل العزوه اللي رفيع شعارها
يكذب اللي يحسب النوم اخير من الصلاه= ملعبتنا طيبه واربعه شعارها

سعيد الفهري=
البقا بك يا عصيمي ومعرفتك غناه=بالنيابه عن رجال تولع نارها
المجاهد عنده الموت اخير من الحياه=ملعبتكم طايره والعقل طيارها

مستور=
من يطب السوق يعرف لبيعه من شراه=والسلع تفرق على بعضها باسعارها
حكم رب الكون يغلب على حكم القضاه=جاتك الثنتين واللي تبيها اختارها

سعيد=
من سبح فالبحر يحرص على طوق النجاه=كل غبه عارفين شكل بحارها
اليتيم اللي تعشّا يابو تركي عشاه=ما معه غير المعيشه لا يرجي غارها

مستور=
من ضمي لو يشرب البحر ما يقطع ضماه=لليال اسرار ماحد يعرف اسرارها
الجراده حلها الله حلال بلا ذكاه=خل عينك من يمين الدير ويسارها

سعيد=
من ضمي يارد على عد راهي في سراه=والمطيه لو تلّقي يموت حوارها
ان تغديت الجراده تعشيت القطاه=وان خبطت الارض فوقك يطير غبارها

مستور=
جاك مني علم واللي ورا قلبي وراه=من عرف مدخالها عارف مضهارها
مالك الاثوب ابيض جديد من طواه=لاتمنى البدله اللي ضعيف زرارها

سعيد=
كل مومن مبتلى والله الخالق بلاه=والرجال الطيبه ماتموت ادوارها
مالك الا القدر والرجل يكرم من نصاه=وانت عود تعرف ضغارها وكبارها

مستور=
خل هضبة نجد تدري عن جبال السراه=سلم البندق يد اللي يحفظ عيارها
الديار ديارنا مالكم غير الحصاه=عقب ما جربت حلواتها وامرارها

سعيد=
الرجل في بعض الاحيان يبحث عن عراه=والحرار الشقر يمدي تعرف اوكارها
السيوف سيوفنا والجنايز فالفلاه=والقبور المستطيله تعب قبارها

مرحبا وهلا وغلا مليون ..

النجم سعيد الفهري .. وجودك هنا مكسب بلاشك ..

وإثرائك لقسم مكتبة الفنون بهذه المحاورات الرائعه .. يستحق كل التقدير والشكر ..


بالفعل محاورة من افخر المحاورات فتلا ً ونقضا ..


سلامي عليكـ , :)

مرحبا ترحيبة تليق بسمو شخصك ياسعيد الفهري

لاهنت وسلمت على مجهودك :)

ووجودك في قسم الفنون الشعبية يزيدها نور وتألق

تقبل مني كل الشكر والتقدير

مع أجمل تحية

أخوك

الاخ سعيد الفهري

صح السانك واللسان

الشاعر الكبير مستور العصيمي

محاورة في قمة الابداع

وعلى القوة انشاء اللة

محمد السيالي

الغالي

سعيـد الفهري


بيض الله وجـهك على نقل هذه الرائعه ,,,


بينك أنت والعملاق
أبـو تركـي ,,

وقمه وإثاره ,,

لاهنت وتقبل تحياتي ,,

عز الله انك شاعر يا سعيد الفهري

وقابلت علم من اعلام المحاوره


صح لسانك ولسان ابو تركي


ولاهنت ،

يا سلام عليك يا سعيد



خصوصا امام شاعر مثل مستور العصيمي


ابدعت بكل حق



وكل الشكر لك على نقلها لنا

ماقصرت ياسعيد ..

اسعدك الله كما اسعدتنا بهالمحاوره ..


الحقيقه انك ارتكيت للضلع ، أبو تركي !
مع الفرق الواضح بينكما ..


سلام’ عليكم

ابداع يالفهري بينك وبين العلم ابو تركي

صح لسانك ولا هانت يمينك