الكسر في وصف القهوه والإبل والطبيعه ( معلّقه )
 

السلام عليكم ..


الظاهر ان باقيٍ على سهيل حول العشرة أيام ،،،

هذي القصيده تهيّض اللي مايتهيّض ، لشاعر أقل مايقال عنه :

شاعر كبير بحق



[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
هات الدلال وولّع النار ياجداع=عجّل عليّه ياعدوّ الرخامه
هات الحطب ياجداع من جبر وولاع=جبره خشب وولاع ناره ثمامه
ولاجاء لصلو النار ياجداع شلاّع=وشفت الخشب قام يتدانا صرامه
احمس من الخولان ياطيّب الناع=لين النجاض يبين فيها وشامه
ودقّه بشاميٍّ يجي له تلعلاع=يصحي النيام اليا ارتهج من منامه
ثم هات لي صهبٍ يداون الأوجاع=اللي من الصالي عليها سحامه
قفز الغوارب والمقاضب والأكواع=وجنوبها ياجداع فيها هيامه
لاوقّفت ياصاح فيها ترفّاع=وفيها مثل حد السيوف استقامه
صهبٍ مثاعبهن مهاديف ووساع=وفيهن على جبر الحديده ضخامه
سميتهن ياجداع والإسم ماضاع=هيفاء وهيفيه وشيمه وشامه
ليا شافها اللي للبغاديد مولاع=شوّك شعر راسه وطشّ العمامه
ولقّم وبهّر وانتبه للتسرّاع=واحذر يجي بك يالبناخي غشامه
خل المبهّر تهتوش فيه الأنواع=بين الشقاره والحمر والدهامه
أذنّ هاجوس القصائد ليا طاع=يقرب ليا فكّ المهيّل بلامه
ويحضر عيون الشعر موجدة الإبداع=ومعانيٍ فيها طراه وجسامه
تذكّر الماضي وتصحيح الأوضاع=وحبّ البداوه والبداوه شهامه
يامحلا لا شيف لسهيل مطلاع=وشافوه تال الليل يلمع زمامه
من نجد يزمي فوق نجران لمّاع=وشافوه أهل تثليث وأهل تهامه
وجاء للهبوب من أيمن الشرق ذعذاع=والعدّ عقب سهيل راعت جمامه
وفزر هجير القيظ واضفى لها قناع=على السلم والسمر مثل البجامه
والبل تلافت للجمل وابرد القاع=وقاموا هل البل ينزلون العدامه
والنار شفت لها مع الفجر شعشاع=وقاموا يحزمون الحطب في حزامه
من عقبها خمسين ليلٍ له أتباع=ليا بكّر الوسمي ودلاّ غمامه
وجاله على ساقان من غرب ميقاع=ويجنب ولايملك عريق الثمامه
ويشمل على القرعاء وبير ابن هزاع=وعلى رجم بذال يرخي خطامه
وليا انهمل ودقه ومزنه ضفى وماع=على قرى الصمّان يبخص سنامه
لين النبات اللي يجي له تنوّاع=يفرا الحزوم ليا تملّت محامه
وضاقت مع المشقر زهازيم الأقطاع=ليا جاك راعي نجد يدفع جهامه
بدوٍ تبا المرباع ثم جتك نجّاع=وكلٍ عصب في سلّة السقس خامه
قامت عطايا الله تضيق ابها الأرواع=شولٍ يازين مع الحماد ادّحامه
أول معاشيهم مشابيع وجياع=وراحوا على ماقيل شدّه وقامه
وشفت العسوس جيوبهم تقرع اقراع=اللي مدح واللي قصر في كلامه
مالوا على دارٍ للأبواش مرتاع=فيها يجي لأهل الحلال التمامه
كلٍ معه وايت وصندوق وشراع=ونارٍ رمادته سواة الردامه
وذبائحٍ تشرى من البدو وتباع=وكلٍ تجهّد ماتردّى مقامه
أخذوا لهم قامات ثم قيّل الراع=وعن ظهر الركبي يحذف المسامه
قرّوا ليا قامت تمريع تمرياع=سوّى لهم راع الكرامه كرامه
ثلاثة أشهر كلها وقت مرباع=وقامه يا لين العشب يدني صرامه
ولاقيل صيفيٍّ على نجد تنداع=كلٍ صفط عفشه وقشّع خيامه
وتمزّعوا من كل جوٍ تمزّاع=بأطرافهم يكفى المدوّر إيدامه
ليا أخذت لي مع سلّة البدو مذواع=فأنا ماعاد ألحقت نفسي ملامه
هذي طراة العمر والوقت خدّاع=وغارات بقعاء ماش منها سلامه
وصلوا عدد ماغرهد الورق سجّاع=على النبي وأزكى الصلاه الختامه[/poem]

[align=left] الشاعر / سهـل الكسر[/align]

،


وعليكم السلام وحمة الله وبركاته



يا مرحبا يا عبد ربه عز الله هذي عوايدك ما تجيب الا النادر من القصيد اللي يستاهل النقل
ابيات في الوصف ما يلحقها ملام كايفه وكافيه الله لا يهينك وصح الله لسان سهـل الكسر


لا هنت وبيض الله وجهك يا بو عتيق









عبدر به : مبروك العذرا والله يستر عليها ويحفظها




فمان الله



.

صح لسان


الشاعر الكبير / سهل الكسر

والله يعطيك العافيه على الاختيار الرائع

ولاهنت يابو حواء

اللهم صلي وسلم على محمد وعلى آله وصحبه آجمعين
وعليكم السلام ورحمة الله وبركاته
هلا اخوي عبدربه
صح لسان الشاعر سهل الكسر
والف شكر لك على هالاختيار الرائع

عبدربه


ياطيب عينك طيباه... عز الله انه قال واجاد


بيض الله وجهه ووجهك






غيمار

يا مرحبا


يابوعتيق


عاداتك الطيب من كل شي


صح لسان الشاعر الكسر

وبيض الله وجهك على النقل الموفق


لك سلامي

:

صح لسان



الشاعر العملاق ../ سهل الكسر



ولاهنت ياعبد ربه

صح لسان قايلها

والشكر لك يا بو عتيق على الاختيار الموفق


فعلا

هذا القصيد والا فلا

لك تقديري واعجابي

وعليكم السلام وحمة الله وبركاته

الله لا يهينك وصح الله لسان سهـل الكسر

سلمت يابو حواء

هـ الله يستر عليك

ماشاء الله تبارك الرحمن


واللهم صلي وسلم على عبدك ورسولك محمد


لاهنت ياعبدربه وصح لسان الكسر

صح لسان


الشاعر الكبير / سهل الكسر

والله يعطيك العافيه على الاختيار الرائع

ولاهنت يابو عتيق

الشاعر / سهـل الكسر

يا عبدربه صدقت سهل الكسر غني عن التعريف واقل ما يقال عنه انه عل من اعلام الشعر وخصوصآ في الوصف




لاهنت لاهنت على المختاره الطيبه


تحياتي

صح لسان الشاعر الكبير / سهل الكسر

ولاهنت ياعبدربه على النقل الرائع

تقبّل مروري وتقديري

شاعر كبير
وقصيده كبيره
شكرا لك يابو حواء

مرحبا بك ملايين يابدر :)


والله يبارك فيك ويقبل دعاءك ..



ولاعدمتك بس :)


سلام’ عليكم

صح لسان الشاعر

وبيض الله وجهك على تحمل اعباء النقل يبوعتيق :)

لاهنت لاهنت ياريس