منتديات المرقاب الأدبية - (عندي لشيال التغطرس سؤالي)

فكرت بالدنيا وزاد انشغالي=وهاظت هواجيسي وصغت الوسيمه
صوغ الذهب من صنع أفكاري وبالي=والله يجنبنا الخطا والظليمه
خذيت درس من دروس الليالي=ومن التجارب والرموز القديمه
والآدمي لو يدعي بالكمالي=الكامل الله والليالي مقيمه
وترى الكبر والغطرسه والتعالي=تعد من ضمن الصفات الذميمه
وتنقص الرجال في كل حالي=لوكان له مركز وقدرن وقيمه
الكبر للمولى عزيز الجلالي=رب البشر محيي العظام الرميمه
والكبر للمخلوق مثل الهبالي=وهظيمتن ياكبرها من هظيمه
وعندي لشيال التغطرس سوالي=وان كان جاوبني خذيت القسيمه
هل يستطيع أنه يشيل الجبالي=أوينشي خيال يزلزل رزيمه
أو ينبت رياض سوات الزوالي=أو يلحق السيل الذي سال ديمه
أويرزق الشيبان هم والعيالي=ويخلي قلوب المعاصي رحيمه
فأن كان مايقدر فلا له مجالي=فليعلم أن بعض العواقب وخيمه
وأنه مايسوى في عيون الرجالي=اللي خطاهم بالوفا مستقيمه
الواثقين الصادقين الثقالي=اللي معرفتهم تراها غنيمه
مايشلع الطاووس جنب الغزالي= والكبر للمخلوق نقص وجريمه