قصة الشايب و الوايت... ( من سوالف المجالس )
 

يسولفون عن شايب نوى يشتري له وايت علشان يسقي الحلال ، وذا الشايب متقاعد وشاري له غنم وفوقها خمسين ناقه ، فأخذ يجمع له فلوس لين صار عنده حول الثمانين خمسة وثمانين ألف ريال ،

فقام وتوكل على الله وعَزْم يروح يدوّر له على وايت .


صدفه وهو يمشي إلا ذيك الناس مجتمعةٍ في أرض فضاء كبيرة ,, الا و حولهم وايت واقف ، و اعجب خوينا الشايب شكل هالوايت وهو ما شاء الله يبرق من بعيد و وقفته شيء عجيب ، قال بس لقيناه خلني أروح أوصلهم وأشوف كم هو واصلٍ سومه وإذا هم حادينه أشوف كم هو عليه .


وصل عندهم الشايب و وقف يسمعهم يحرّجون ، و استانس بالحيل لأن الوايت مو غالي ، المهم و يشوف ذاك الرجال ماسك المكرفون ويحرّج 50 ،، 52 ،، 55 ،، ومن قال زود ، قال الشايب بس شكلهم يحرّجون على هالوايت ولا هوب بغالي وإن شاء الله يكون من نصيبي .


ويخش معهم بالحراج ... 56 ... ويزودون ... ويزود ... ويزودون ... ويزود


المهم وصلوه 75 ... قام خربها وقالهم 80 ...


هو قالهم ثمانين؟ ... يوم طخوا كلهم وسكتوا .. ! ..وهجدوا .. !! .. والتفتوا عليه .. !!!


يناظرونه .. يناظرون بعضهم .. يوم تغامزوا ونقز له واحد منهم .. ويسحبه على جنب وقال له شف يا رجال أنت باين عليك أبن حلال وطيب بالحيل ، وش رأيك لو نعطيك شيك بمليون ريال ذا الحين ذ الحزه بس أمش من هنا ولا نشوف وجهك واقف معانا بالحراج .


أنصدم الشايب .. أفتر راسه له شوي وقال هااااا .. وش السالفة .. ؟؟!!


مليون ريال .. وليه..؟؟


قال له الرجال بس .. خذ هالشيك وتوكل على الله والله يستر عليك ولا لك بالطبخه


وش أسمك ..؟؟ عطاه أسمه وكتب له الشيك بمليون ريال وصرّفه الرجال من الحراج
و هو ما يدري وش السالفة .. !!



طيب وش العلم علمني .. ؟؟


علمه بالعلم أثر ذا الجماعة يحرّجون على المخطط وواقفين بالصدفة جمب الوايت اللي جايبينه يرشون به الأرض علشان يحرّجون ، والحراج من اليوم بـ 56 مليون و75 مليون .. وأبو الشباب (الشايب) خش عليهم عرض ولا يدري وش العلم .http://nawader.net/montada/images/sm...103gig_prv.gif


وهم بعد أخترشوا شوي يحسبونه هامور وبيلطش عليهم المخطط .. قاموا صرّفوه بمليون ريال ..




وهو ما صدق.. طاير من الفرحة مليون ، ويقول بخاطره


(عجزت وأنا أجمع ثمانين خمسة وثمانين ويجيني ذا الرزق من الله)


فسبحان الله مقسم الأرزاق على عباده .
الرزق مثل الأجل يتبعك

http://nawader.net/montada/images/sm...03_ign_prv.gif






الله يرزقنا بمخططن بالغلط

ماحولكم وايت للبيع ..

http://nawader.net/montada/images/smilies/karem/005.gif

,


اي والله اني سامعها قبل
لكن الي سمعته انه شراها ويوم جا يوقع جاه واحد ودبل له السعر


قصه جميله والله يرزقنا :)

لاهنت يا ش س



..

ههههههههههه


سامعها من قبل


سبحان الله رزق من الله وجاه


تسلم على الايراد



لك كل الود


:)

ش.س


حيك وحي هالسوالف وهالسالفة حقيقية ومعروف هذا الرجل اسمه (نعيس الرشيدي) والروايات مختلفه احد حطه كداد تكسي ولقاهم يحرجون على مخطط ويحسبها ارض وقام يزاود ويوم عطوه النيه ووقف عنده السوم جاه احد الهوامير وفرق بمليون وطلع مايدري ان الدعوه بالملايين وافلح وهو الان من كبار التجار في الرياض ومن ملاك قاعات الافراح المشهوره بالرياض ..



والله يرزقنا وياك الجنة وبوايت يجيب مليون ريال وان صارت ترى لك ربعها يابو مهنا..



لك فائق احترامي وتقديري ...!!