منتديات المرقاب الأدبية - ياليتني ما جيت للسوق قبل امس،،،، قصيدة غزلية لخالد بن محمد

السلام عليكم ورحمة الله

هذه قصيدة للشاعر خالد بن محمد البيضاني الحربي وهي من قصائده الغزلية القديمة ارجو ان تنال رضاكم واستحسانكم.

القصيدة:

ياليتني ماجيت للسوق قبل أمس=كان الجوارح ما تدانى خطرها

قابلت لي دُرة توحَّش من اللمس=تسلب عقول أهل الهوى في نظرها

من شفتها بالسوق عشري غدن خمس=هنيت شخصٍ في حنانه غمرها

من زينها نور القمر قال للشمس: =من نورها غطت علي بسفرها

ردت عليه الشمس: لا تنحمس حمس=أنا شعاعي يشتكي من نحرها

وكل الكواكب لجلها جاء لهن همس=كلٍ على الثاني شكى ما قدرها

من لا مني فيها عسى قلبه الطمس =وعيونه الثنتين تفقد نظرها

قلته وأنا بأسبابها خاطري عمس=ما عاد أميز برها من بحرها

وله في الغزل:
مزّع ستار الصمت عن مخزن الجوف = والمختفي بَيّن نوادر خزينه
ترى حلاة الحب لا صار مكشوف = بيني وبينك والملا جاهلينه
اخلص معي لا يعتري قلبك الخوف = حب الشرف لو بان ما أحدٍ يدينه.

وله ايضا:
لو قلت بأعلى الصوت لا ترتجيني = أسكِت وكِنِّي ما سمعتك وأنا ارجيك
وان قلت لي رح وأنسني لا تجيني = أقول حاضر وأبتعد عنك واجيك
تدفعني أشواقي وزايد حنيني = يمك وقلبي بالحقايق يناجيك
ما أقدر على النسيان يا نور عيني = لو طالت الايام ما ني بناسيك
عايش على ذكرى قديم السنيني = أيام ما كانت عيوني تراعيك