النيره

[align=center]عظيم الشان في قربك وفي بعدك عظيم الشان ,,, وصالك موت ! .. والموت الحمر من قلة وصالك

رهيف .. اي والله انك سيف ياعمري بروح انسان ,,, على الحدين تدمي لمستك .. في كل احوالك

مثل جمر الغضى في ليلةٍ .. فيها المسا بردان ,,, وأنا ذاك الغريب اللي .. ذبحه البرد واشتالك

يضمك .. للدفا واحرق اصابيعه من الحرمان ,,, هرب من هول بعدك .. وارتمى في جملة اهوالك

حرارة قربك ارحم من جليد البعد .. والنسيان ,,, يشب القلب من نارك .. واقول النار اشوى لك

اعرفك .. واعرف احوالك ، واعرف ان السفر احزان ,,, أجل مانيب انا اللي عايشت حلك وترحالك ؟؟

سفرك .. الموت للخافق ، من الشريان للشريان ,,, ترى غيبتك تذبح ياحبيبي .. وش على بالك !!

حبيبي والبلد موحش بعدك ، ولابه اطمئنان ,,, كأن العالم اللي فيه راحت معك .. تبرا لك

كأنك يوم رحت تقول : انا ومن بعدي الطوفان ,,, وانا لك ماقويت اقول : فال الله ولا فالك

سفرك الله يسلم لي عيونك ، فوهة بركان ,,, وأنا من قلة الحيله .. ماغير اقيس زلزالك

يعين الله على بعدك ، حبيبي ياعظيم الشان ,,, ويعين الله على قرب .. يشابه قلة وصالك




[mark=CCCCCC]للمبدعه \\ نيـّافــه[/mark][/align]