[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
الهواجس راويه والمهوجس ذاوي = والبحر محباس والقافيه محبوسه
يالقصيد السارح ويالقصيد الظاوي = المفالي كلها قبلنا معسوسه
وش يودينا لجاوه نجيب الجاوي = وربعنا الخالي نعرف إيش تحت طعوسه
مشكلتنا المحترف ما يحب الهاوي = ومجتمعنا شين وأوضاعنا محيوسه
والله إن نبطي على وضعنا المأساوي = ننتهي من حوسه ونبتدي في حوسه
دام روس القوم يلوي عليها اللاوي = أمحق أمحق قوم روسه تحب هيوسه
فضّـلو رابح على محمد المنشاوي = وقطـّعو المتراخيه وأرخو الممسوسه
وخلّو الشاعر يوقف مكان الغاوي = وعلمو المحروس يلعب مع المحروسه
ونطـّـقو الجداوي بلهجة الجهراوي = والخطط هذي على ما أعتقد مدروسه
شدّ حيلك يا إتحادي ويا نصراوي = وأعطي الجمهور يا بنت بقعا بوسه !
والنتيجه عان نجم الزهاري هاوي = وقام أبو كبّوس يمسح على كبّوسه
وقمت أنا متضايق وخاطري متلاوي = والسقوط المعنوي علةٍ محسوسه
وصيحة اللي يكتوي ما تهز الكاوي = وطيحة الغارس بعدها تموت غروسه
أسمع الواوي يواوي وأكب الواوي = ليه أدس الظاهره وأكشف المدسوسه
بيني وبين النقا والشموخ يساوي = والزمان يلقن الصابرين دروسه
من يعاف المزدوج يمسك الصحراوي = لايقول أن المسافه مهي مقيوسه
وأنت ياللي للمسافات دايم طاوي = موترك مضبوط ماهي تحن تروسه
حمّل الركّاب ياراعي التسعاوي = والمسافه تنقطع حسب وزن الدوسه
الزحول اللي معـك شلّـة الزحلاوي = لا تـراعيهم ترى جيوبهم متروسه
ولاتقول إن الجبل فيه ذيب عاوي = من بغى الطاله يدك الخطر ويدوسه
المراجل كايده والزمـن ما ياوي = لكن عقول العرب ناخرتها السوسه
يتركون العامر ويزبنـون الخاوي = والولد ملحوس وأخت الولد ملحوسه
كثرو المرضان يالربع ويش نداوي = ذا يكحّ وذاك تصلب عليه ضروسه
بس أنا لاني بقاوي ولا متقـاوي = وش علي لو رفرفت رايةٍ منكوسه
الروايه ما توفــّـت ومات الراوي = لا يدوس العلم من يجهله ويحوسه
موجزٍ قلته ولاني لشـرحه ناوي = والحـروف مرتـّبه والجمل معكوسه
هوبلة وبـّال مدري مغنـّي شاوي = بيّـنه واللي يقول إنها مطموسه
ماله إلا ينشد دغيـّم الظلماوي = عن علوم اللي شرى غايته بفلوسه؟![/poem]