منتديات المرقاب الأدبية - عرض مشاركة واحدة - 000 الرجل نذكر فعله الطيّب..ولا نذكر رداه 000

#1 11-04-2009, 03:18 AM

السلام عليكم ورحمة الله وبركاته

مشاركة متواضعة للتواصل آمل أن تجد لها في وطن ذوقكم الراقي مساحه .. مع الإعتذار عن التقصير.

يا صاحبي..لا صار حتّى القلب نبضه مصلحه
دوّر إل//كوكب ما بعد جا للتطور به نواه

ما عاد نبغى كوكب(ن) سطحه تحوّل مشرحه
الناس تاكل بعضها..من شان مال وشان جاه

اللي ذبح له واحد(ن)..بكره ذبِح في مذبحه
واللي سحن بعض الدوا للناس تسحن له دواه

واللي شعور الناس يجرحها..شعوره تجرحه
ومن بَرْ غيره بالشقا..ناشه نصيبه من شقاه

والوضع حتى اللي عرف سره صعيب(ن) يشرحه
واللي ينادي يمكن إذنه ما توحّى في نداه

صار الممثل غارق(ن) فالنص وازعج مسرحه
واللي يصفق خوف..ولاّ طامع(ن) فاللي وراه

واللي بقوا تقدر تقول أشباح تسكن الاضرحه
أطيبهم اللي عن ضريحه رافع(ن) بيده غطاه

والعاقل اليا من كتب حرف(ن) يجي من يمسحه
ويقول له وش فيك يا الطيّب عكست الاتجاه

لا تعكس التيار ثم باب المشاكل تفتحه
وتصير مُتْهَم بين حد التبرءه..والاشتباه

من سبتك شيخ البلد ما عاد دانى مشلحه
وانته سبب موت الغريق برميك حبال النجاه

قلت..أصلاً التيار كله مصلحه في مصلحه
واللي يحاول يعكسه..يعكس قوانين الحياه

والرجل نذكر فعله الطيّب..ولا نذكر رداه
الكون ضيّق..غير بعيون التفاؤل ما افسحه

وسلامتكم

عبدالله بن عايض الفهري