[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
سلام الله وصلى الله على نبينا المرسول=شفيع الخلق في يوم يشيب الراس من هوله
نبي خصه الله بالرسالة بالعفو مأمول=عفى عن كعب واعطاه الأمان وقرّبه حوله
بعد ما ضاق به كل الفضا والأرض عرض وطول=وهذي فطرة في الأنبياء بالعفو مجبوله
عطاه البرده اللي سدوها بالمنشزة مغزول=من أحسن ما لبس هذا الكرم معناه ودلوله
وبأثني بالسلام لسيدي مصدر فخر وفعول=تواريخ تسجل بالشرف والمجد مصقوله
نرحب فيك يا صنديد ابن صنديد يا مشغول=بشؤون المسلمين ولا تريد العُرب مذلوله
جمعت الشمل والله ما يجمع من بعدك شمول=وأقول أدعو لعبدالله ثم ادعو له ثم أدعو له
ولا غيرك لنا قايد وبالعمر الطويل تطول=طويل ذراع راهي باع ليت تكسب الجوله
تحملت المهمة يا ملكنا والزمان يهول=فلا نامت عيون اللي يحلو النوم مكحوله
أخصك ثم أخصك بالكلام الطيب المعسول=مشاعر شاعر يهديلك الأبيات مفتوله
قزايز ما نقيته وانتقيته من خيار الشول=بكار وضح نخبه من خيال الشعر مسموله
هن المسك والورد الندى والعنبر المعمول=وخذ فنجال رسلانية بالهيل مزلوله
إي والله شارب يستاهل الفنجال فعل وقول=لك الهيبة بك الطيبة بك الأوطان مكفوله
تحني والبسي له وأنثري فوق النحر مجدول=لكساب الجميل وفي عيون الناس مجموله
تخطي واسحبي ثوب الحرير بعرشك المحمول=على أكتاف المليك وتعرفين المُلك منهوله
فحل والله فحل يابن الفحل واللي جديك فحول=من أولكم لتاليكم عطا وإحسان وبطوله
خطبت الخطبه اللي بالكويت تداوى المعلول=تطيب ابها النفوس ولا تجي وتروح بسهوله
خطابه صارمه يا قف بها شعر الولد مذهول=دهاه وموقف حازم وعزم وجزم ورجوله
تحل الشفره اللي ما لها بالعالمين حلول=صحيح ان كان ما حليتها ما هيب محلوله
هذا اللغز الكبير اللي يخلد في الحيلة زحول=الا يا زحلنا ياللي لك الأزمات محيوله
نشم العز من عزك شربنا الصافي الشهلول=على يمنا تدفق ساقيه للشعب معدوله
ومن عطفك ومن لطفك سكبت المارد المنهول=على الطفل وعلى الطفله رعاية منك مشموله
ترا الأيتام في ذمتك وإمسح دمعه المكفول=ينحيك الكريم ودعوة الأيتام مقبوله
ولا ننسى ولي العهد جعل الباس عنه يزول=يجي سالم وغانم والقلوب تحن مشغوله
يا كم من مخلص كمه غدا من عبرته مبلول=على بعده تردد سورة الرحمن مرتوله
يالله ترد اللي لمستور الحوال يعول=تفرج عن غريب بالمغيبة ضايق حوله
نبي شوفه ومعروفه نعد اليوم كنه حوله=هل الحاجات بعد الله على سلطان متكوله
تحياتي لمسلوت العرق وبجهده المبذول=يصد المعتدين وديرته بالأمن معقوله
هذا نايف وزير الداخلية بالسلاح يحول=يذود عن الوطن ويقوم في واجب علم دوله
ولد عبدالعزيز ببندقه وبسيفه المسلول=يعدل روس كانت في سبيل ابليس مغسوله
محاميل الرجال الواجبات وللجمال حمول=ليا ثار الجمل بالحمل قام الرجل محموله
من المسؤول عما صار في غزة من المسؤول=مجازر نفذت بالظلم واسرائيل مسؤوله
تطبق محرقه هتلر على شعب عزل معزول=عن العالم وغزه مع مهب الريح معزوله
هذا شعب دعا الله فيه لا القاتل ولا المقتول=ذعوف تحت ضغط النار بالغارات مسحوله
ولا حول ولا قوة على ما صابهم لا حول=قضية بُركت في محر التهويد مقتوله
كلام بلا سلام ولا احترام وكلمة المعقول=عليه أقروا سلام وفارس القسام قولوله
يواصل في كفاحه بس لا يذبح همم وعقول=حرام ودبرة ما هيب في الاسلام معقوله
يقولون الكريم ليا نزل صكت عليه نزول=يُشاف الخير فيه وجرته بالخير مدهوله
وليا مريت إلك قاع قحط عج ودهر ومحول=تعدّه وإنص دار من صدوق الغيث مسيوله
ولا نفلس من العاقل ولا نسمح من المهبول=ولا ناخذ مشورة جاهل ما بان مفعوله
ولا يحتل ذكي واللا الغبي مع غاربه مختول=ولا يُؤخ عرب بعد النذر بالغدر مختوله
ولو سرحت بعض الناس في قطعة غنم وعجول=لها أفضل من سياسة دولها البيبان مقفوله
أرادم مالها حرفه ولا صرفه ولا مدلول=تعالي يا جزور ولحمة الجزار ماكوله
نصحناهم فلكن ما يفيد النصح وش نقول=فرق متفرقة وأحزاب متفلّة ومفلوله
أيادي تشتغل وتحط من خلف الرؤوس ذيول=شتات ومشكله متمشكله بالطبع مفعوله
مصيبتنا في عروبتنا تراوح في وحل وغيول=تخلت عن مباديها ونار الحرب مشغوله
ولا نعلم ولا ندري عن المستقبل المجهول=تمر أحداث مشحونه بعلم الغيب مجهوله
جرايم محزنه سودا تثبتها شهود وعدول=تصرف مجرم خلا كبود الناس معلوله
يهددهم شبح موت تمثل في وصايف غول=حيوان مفترس جاهم يشيل الموت بحثوله
على غزة دمار وعار شعب بالشرك محبول=عسى رجلٍ سعت في شِقّة الصفين مشلوله
يلقيها الطاير المشؤوم بانواع العذاب يجول=بلاد واقعة شرقي رفح بالجان منزوله
يا ربي تنقذ الغبرا ولا يبقى عليها زول=من أم العنصريه والخبر عاجل لها روله
ولا يكسر خشوم القوم غير المدفع المكيول=وقوم ما تخاف عقابنا جسرا ومخذوله
بزند بواردي قاسر عن ساعد مفتول=ليا منه ثنى الركبه يحشر الجمع بفعوله
فتحنا القدس من بطن الجزيرة في سروج خيول=تهاذب بالعيال اللي لنصر الدين مرسوله
هبطنا الأودية غازين واجتزنا وعر وسهول=وحررنا الديار وراية التوحيد محموله
فرشنا الأرض بالدم الحمر بالفجر فرش زلول=وصلينا جماعة وأيدي العدوان مغلوله
هذا قولٍ عليه ثبوت بعصور مضت مقيول=وليا قالوا من اللي قايله قلناه وتقوله[/poem]
خلف بن هذال العتيبي
جنادرية 1430 هـ
..
|