فاضت بالحكم والبدع الرزين
للرائع / مشعل فالح الذيابي
قدام تشرق شمس دين الحق فالكون الرحيـب
ومن ركنه الشرقي يشعشع نورهـا للمغربـي
الناس كانوا فالقمم والعرب في وسط الشعيـب
وانزل قدر بين الامم فالكـون قـدر اليعربـي
لين اعتزوا باسلامهم واصبح لهم قدر ٍ مهيـب
ولولاه ما صاروا ملوك الكون والشعب الابـي
الدين مقياس الحكيم اللي علـى خلقـه رقيـب
للاسـود وللابيـض ولليعربـي والاجنـبـي
بلال الاسود فضله ربي مع الرومي صهيـب
والفارسي سلمان بالتقـوى علـى عـم النبـي
وانا ولو اني مقصر ولهوى النفـس استجيـب
ولا اطول اللحية ولا اقصـر ثيابـي وشنبـي
لكن يقيني ثابت ٍ وانا بشر واخطـي واصيـب
اخطي واتوب وعفو رب الكون غاية مطلبـي
والجادل اللي في نحرها عقد في وسطه صليب
وخضابهـا دم ٍ حـرام ولا تستـر بالعـبـي
ومن بعد ماتت جالها مليون عشـاق وخطيـب
ولو تنبعث شفت اكثر الخطبان عنهـا تختبـي
ما حركت قلبي ولانـي مـع حبايبهـا حبيـب
ولانيب من ناس ٍ سباها ماضي الجادل سبـي
ناس ٍ سبتهم من قبل جسـاس لا يذبـح كليـب
ولازال نصف المجتمع بكري ونصفـه تغلبـي
تعايبوا ما لايعيـب ولا لقـوا فالعيـب عيـب
وانا ماشوف العيب غير اللي يخالـف مذهبـي
مادامني مسلم ولي مذهب ولي فكـر ٍ نجيـب
وشهوله اترك نهج ديني واتبع الفكـر الغبـي
ودام الرواسخ ثابتة فالقلـب دايـم مـا تغيـب
ما همني لو ضاقت صـدور المهبـل بسببـي
اوزن بميزان الحلال من الحرام ومـا يريـب
اجنبه لـو اخسـره خسارتـه هـي مكسبـي
ولا شاش راسي معك مهما قلت يالفذ الاديـب
ياللـي بمسمـوم القصايـد للمحافـل معتبـي
تقادح عيونك ويومي كفك ووجهـك غضيـب
وتقول كل الطيب واصله والفخر في منسبـي
ربعي هل الردات والعادات وكعـام الحريـب
والمجد في ماض الزمان وحاضره دوب عربي
ارفق بنفسك واشبع من الرز وارو من الحليب
الناس وصلت للثريـا وانـت فالقـاع تحبـي
ان كان تبغى المرجلة عان العرب فوق القليب
ادحم بجنبك واشرب بيمناك كان انـك صبـي
وخل العرب تعرفك بفعولك على عز ٍ وطيـب
واترك سوالف كان جدي فالقدايـم كـان ابـي
والدين حدد بـه شعـورك للبعيـد وللقريـب
الدين راس المرجلة والعنصـرة راس الظبـي
راع المعاصي والردا والبخل لو جده عريـب
ان جاك ودّر له وقل له يا اسود الوجه تهبـي
وراع الوفا والدين والفزعات والعقـل اللبيـب
في صدر بيتك قلطه لو كان من ظهر صلبـي
ماشاء الله تبارك الوهاب ،
..
|