الغلا اللي له معاليق الخفوق حيامي
كل عرق من العروق اليا ضما يروى به
مابقالي من غرامه غير جرح(ن) دامي
لاعبس وجه الزمان آموت به واحيابه
كل ما سجّ الفكر في عالم الاحلامي
واستراح البال هاجوس الخيال ادوى به
تاخذه ذكرى غلاه لسالف الايامي
والخفوق يسوقه الشوق لحنين احبابه
وان هما زود الغلا هبّت به الانسامي
وانتشا قلب العنا والشوق شرّع بابه
زادت الفرقا لغلا والشوق جمره حامي
والحنين لفرحة اللقيا يحثّ ركابه
اتيمّم وجهة دروبه واسوق اقلامي
وين ماوجّهت بالحرف أعتلي مرقابه
كود ينسيني شقاي ولوعتي والآمي
هاجس الجرح العتيق اللي تفوح اطيابه
كل عرق(ن) من عروقي للمواصل ظامي
وكل جرح(ن) فزّ مع نبض الغلا لاغنى به
ما بقابي شي حي بشوفته ماهامي
غير نسيانه وكسرة خاطري وعتابه
ماقدر أنسى أغلا همومي وأصدق الاوهامي
لوقضيت العمر اقاسي لوعتي باسبابه!
كيف ابنسى حب من قدره بقلبي سامي
لاسرى فكري بطيفه زارني بغيابه
بس قومي ياهجوسي وان بغيتي نامي
لوغرس وقتي بقلبي دون وصله نابه
والله ليبقى غلاه بخافقي مترامي
لني اليا جيت ابنسى كل طاري جابه