يالله ياواسـع الرحمـه عـزيـز الـجـلال
يسامع ٍ فـوق صـم الصخّـر دبـي النمـل
ماغير فزعتك لامـن ضـاق فـي المجـال
ماكامل الا انت غيـرك لـو كمـل ماكمـل
رجواي في كل حيـن وكـل ساعـه وحـال
يالله عقـدت اتكالـي بـك وفيـك الامــل
يالله عبـدك طلبـك ولا لغـيـرك يـسـال
وعبـادة العبـد للمعبـود قـول وعـمـل
ارفعلـك يـديّ خـوف وشفقـه وابتهـال
ومن خشيتك لاذكرتـك دمـع عينـي همـل
طالبـك عفـوك وتوفيقـك ورزق ٍ حـلال
لو كان طول انتظار الحاجـه اصبـح ممـل
البارحـه كـل ماليلـي سـرابـي وطــال
ماغيـر أجمـع خواطـر ولا أرتـب جمـل
والشعر وقت الشدايد مأحسبـه راس مـال
لكـن هجـوس ٍ تردنـي ماتصـدر هـمـل
ولكل شي احسب من احسن الى اسوا احتمال
وان كان مأجمع شمل مانـي مفـرق شمـل
واليوم لـو الصبـر مالـي عليـه احتمـال
لكـن محمـود للـي فالمـواقـف صـمـل
ليا قام حظـي وانـا رجـال بيـن الرجـال
ابكسب رهان من يركـب حصـان او جمـل
لو كنـت قاصـر نظـر ولا قصيـر حبـال
ماجيت من دار ابـو متعـب لـوادي رمـل
لله درك يابوخالد
خيال رائع وشاعريه فذه
صح لساك
لك كل الاعجاب والود
|