[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يا راسي إثبـت والقوافي للذهـاب = البـدع رايـد والمعـاني رايـده
صحيح أنا شيّبت مافيها كذاب = الشيب في راسي نثـر بـدايده
شيّبت لكن هاجسي ما قلت شاب = دامـه يجـاوبني وذي جـدايـده
الشعر مثل الـلابة اللي ما تهـاب = هو عزوة الشاعر وهـو سنايده
مثل الحبابي لا تعـزوى بالحباب = والاّ الرشيدي لا نخـا الرشايـده
أبدع وأغنـّي والخطا عكس الصواب = والفكـر جيشً ما يخـالف قايده
قصّاد وألعب صح وأعوج الرقاب = مثل أي شاعر يحترم قصايده
سجّل حضوري في سجلاّت الغياب = لا صار مابه من حضوري فايده
والذيب ما ينقص مقامات الذياب = لا في رخـا وقتـه ولا شـدايـده
أمّا طريد الذِلْ وطرّاد السراب = يختـار يا رجل البليهـي يا يـده !
وأن كان عيّا قلت له شلفا ذياب = دايم عن ذياب المسمـّى ذايده
وشلفاي أنا بيتين من باب العتاب = إسمع من اللي خصّك بفرايده
يابو الشباب إرتاح عند أم الشباب = حايـد وخلّ أم الشباب محايده
ما للصعايب غير حلاّل الصعاب = والكـايده تبغـى زبون الكايـده
ماهو بشرطً ينفتح لك كل باب = وإليا أنفتح لك باب وش سدايده
يبقى على ما قيل باب بْـلا جـواب = حـراج واحد والحـراج مـزايده
أمّا يوصّلهـا المحرّج للسحاب = وإلاّ يطيّـحها عبث ومكـايـده
إعجب ولا تعجب ويا كثر العجاب = دنيا العجـايب بالعجـايب جايـده
يمكن يبيض الصقر ويشيب الغراب = حتى القطاه يجـوز ترجع صايده
ويمكن تشيل الفيل جنحان الذباب = ويمكن تسمـّى العنـز ريم القايده !
يمكن ويمكن ما يعدّدها الخطاب = أكلـت نواقـص وقتنا زوايــده
عادي ولا أهتميت في ودّى وجاب = ما همـني الاّ من ربوعـه سايده
إي والله إن ربعه متـّعبة الركاب = روس الـرجال مقـرّبين النايـده
لكنـّه أخلف طبع سمحين الجناب = صفــّى وباع سلومه وعـوايـده
ما غير يطمر من دحالً في هضاب = ملهـود مدري وش سبب لهايـده
وأنا كذيّا فوق ضرس وتحت ناب = وآهايـد المـوضوع كيف آهايـــده
ما شدّني يا كود عنوان الكتاب = وراعي الجرايد يفتـرش جـرايده
بس الكتاب آشوف مضمونه خراب = بانـت حـروفه وأختـفت فـوايده
الميّت وحيـّد وتسع إمية مصاب = كبـّر وخلّ الفاتحـه والمايــده
الميّت اللي مثل ذا باقي زهاب = آصنــّفه في بند حاجه زايـده
أن جيت أعزّي والده نلت الثواب = ولا ني بماثـوم لو بآعايــده
ما ودّي آزعّل موفـّين النصاب = بأسباب نقصً ما تـرك ردايــده
لفته ولا فيها ثواب وْلا عقاب = مضمـون هرجً راح ماني عايـده
يا لجنة الرحمه هنا لجنة عذاب = ما صادها الشيطان في مصـايده
عندي عربنا الباقيه تحت الحساب = مع السلامه يا عربنـا البايـده !!
[/poem]


بما إني ضد مقدمات القصايد ومؤخراتها... ولكن للمعلوميه أرسل لي أحد الإخوان رابط وجدت فيه قصيدتي الأخيره وقد أستلمها وأستلمني أحد الأسماء اللامعه وأخرجني عن الملّه بحول عشرة الآف كيلو بس سامحه الله وهداه !

من الذكـاء متابعة طاش ما طاش
........ وأكبر غباء إنـك تتابع خـواطـر !