يا عالم اسرار الضلوع المحاديـب
يا من نصلي له ونخشـى انتقامـه
يا مجري الما في نيـاط اليعاسيـب
يا منشي الطل في جيوب الغمامـه
يا رب ورّدنـي لعـذب المشاريـب
وادلف على قلبـي بـراد السلامـه
فإن العمر مجبول بالشـك والريـب
والعاقـل اللـي لازم الاستقـامـه
للقـرم وقفـه وانتباهـه وتهذيـب
والخبل له نشـوه وحفـرة ندامـه
وإن كان ما رد الرجل حادي العيـب
حـرام مـا يقـدح زنـاد القرامـه
والمرجله يا صعبها مـن مكاسيـب
يـا كـم زبـونٍ وردتـه العدامـه
يبغى لها قـرمٍ يـدوس اللواهيـب
حتى يجي قسمه من أعلى سنامـه
يصبر صبر سود الدليّ المجاذيـب
حتى على راسـه تزيـن العمامـه
والرجل ما يَعرف سوى في المواجب
يثبـت بميقافـه ويكـرب حزامـه
ما قد خنع صوته لشذب العراقيـب
ولحوم خلق الله ماهي من طعامـه
صمصام شغمومٍ عطيب المضاريـب
يعجبك في فعلـه وحكمـة كلامـه
كسبك يزيده فخر بيـن المناصيـب
يفرح بكسب ايدك ويطـول مقامـه
حتى ولو فعلـك غشتـه المثاليـب
عند العرب قال الفعل فـي تمامـه
زادك من امداحه مابيـن الاجانيـب
حتى تصير امداحك اسمى اهتمامـه
والبعض ما يتصيّـد إلا العذاريـب
حسـود وانجـازك يكـدر منامـه
يتلحقك بيـن العـرب بالمشاهيـب
هذاك عـدّه مـن طيـور الرخامـه
والذيب مدهاله بـروس المراقيـب
وإلا الثرى ماوى للـراس النعامـه
والصقر يدمي صيدتـه بالمخاليـب
يضرب ثناديهـا بعـزم وصرامـه
والبوم في عشه يجـرّ النواحيـب
بومٍ ولَد بومٍ سكـن عـش هامـه
والمحقره يـا كبرهـا مالاقاريـب
خصوص ممن تعتقـد بـه فهامـه
وإلا ليا جت من عزيز الاصاحيـب
يا كبر عذروبه ومـا اكبـر ملامـه
تصقر بقلبك مثل صقـر اللواهيـب
والمشكله وشلون تنـزع سهامـه
والقاصي إن هز العصا والمشاعيب
ما حد يلومك لـو تكسّـر عظامـه
ترميه رميه مـا بعدهـا تطابيـب
وتغيبـه فـالارض تسعيـن قامـه
والشيب بوجيه النشاما ماهو عيـب
عيب الرجل لا غاب عنه احترامـه
واللي تعلق في زيـون الرعابيـب
يصبر على همه وسطـوة غرامـه
واللي مشى في مدلهـم الاكاذيـب
دربٍ مشى بـه يوصلـه للندامـه
واللي ترفّع عن جميـع الغثاريـب
ماله جزا مـن بعدهـا إلا الكرامـه
والطيب لا تستغربه من هل الطيـب
قوم الوفا والجود وأهـل الكرامـه
يستقبلـون ضيوفهـم بالتراحيـب
والهيـل والتقديـر والابتسـامـه
ما دامت الدنيا لصالـح ولا شعيـب
ولا دامـت الافـراح لابـو دلامـه
يومٍ تصّوب فرحة الوقت وتصيـب
واليوم الآخر حـزن وإلا انهزامـه
والناس مجبوله ولا تعلـم الغيـب
إلا إننـا نومـن بيـوم القيـامـه
نشقى ونتعب طارديـن التسابيـب
وآخر مصير الرجل يطوى بخامـه
ما ينذخر غير ابتهـال المحاريـب
والحج واخـراج الزكـاه وصيامـه
يعرض للاعين ما كتبـه الكتاتيـب
في يوم يدلـج كلنـا مـن زحامـه
في يوم ما ينفعـك كثـر التناديـب
كلـن يـردد قـول يالله السلامـه
والعمر فانـي والحيـاه التجاريـب
والرابح اللـي حسّـن الله ختامـه
لله درك
من اروع ماسمعت
شعر حقيقي يامحمد
الله يسعدك ياشيخ
اقسم بالله انك اسعدتني
تحيااااااااااااااااتي يابطل
|