[poem=font="Simplified Arabic,6,black,bold,normal" bkcolor="transparent" bkimage="" border="none,4,gray" type=0 line=1 align=center use=ex num="0,black""]
تجلت عظامة قدرة الواهب الدوام=اله تساوى بعزته فوق كرسيه
بعد مانشى بامره سحاب ٍ من الالهام=يغطي مساحات الخيال الفلكيه
ثقيل ٍ مقاديمه لها بالآفاق ركام=تقول ٍ ربانه جبال ٍ جليديه
دوي الرعد باطرافه يصحي النيّام=ولو زاد صدّع بالمبان الزجاجيه
ولمعة بروقه نورها يجلي الاظلام=لالاحت بروق المجد باغلب نواحيه
بعض خطها مثل التواقيع بالاقلام=تشوق المخيّل لاحتمة باشتعاليه
من الغرب حدّر لين وجه بشكل ٍ عام=تناحا مقاديمه وتزمي تواليه
يسوقه هبوب ٍ هادي ٍ مشيها وانسام=تلملم شتاته وتحداه بشموليه
هبوب ٍلوان الرجل يرقب بضلع ٍ زام=يحرك هواها شماغه شويه شويه
بعد ماوصل دار ٍ عربها ضمي وحيام=ركد عنه مد الريح وارخى عواليه
تهاما على ارض ٍ وجهها بالضمى منضام=بوبل ٍ يحد الشوف كثرة تهاميه
وقامت بدون سدود تجري مع الآنام=فرايد خيال ٍ ماسبح بالفضا زيه
خيال ٍ فلك لاقيس حجمه مع الاحجام=ماخذ منه حجم الكون عشرين بالميه
مع رحابه يصير السما بحجمه المترام=مثل حجم الارض مع الرحاب السماويه
تعبره بيوت الشعر مثل الضيا فالجام=ليا سار موكب ركبها من محانيه
بيوت ٍ مرصعت ٍ بعاج وذهب ورخام= وزنها يعادل وزن الارض الكرويه
تعرض المشاعر مثل ماتعرض الافلام=على هامش احدث الظروف الحياتيه
ماغرتني بعظمة منازلهن الاوهام=ولاسمع هروج الساذجين الاقليه
مدام النفوس احيان ماتصدق الاحكام=على ماتوده تنجرف لاشعوريه
لكن الحقيقه وجهها ماعليه اقتام=تجلى على ارض الواقع بشمسها الحيه
ضروف الزمن والزيف وادعاية الاعلام=ماتخلف ثوابتنا بهاذي وهاذيه
غموض الليالي معول ٍ للامل هدام=ولكن ثقتنا راسيه مثل ماهيه
نعرف ان رحلات السفن في بحرها الطام=تواجه صعوبه قبل ترسي موانيه
هذا الياس يحدى الركب من ماضي الاعوام=ولاطال هامات الطموحات موليه
اخذ من مدانا اللي ماينقاس بالارقام=كثر مالغصن ياخذ من الشمس له فيّه
لكن الديار اللي لها نتعب الاقدام=ويهمى السحاب برحبها كل عصريه
مصير الزمان بجوها ينحي الاجرام=وتبقى الكواكب فالرحاب الفضائيه
وانا عن دروب الظن والشك والايهام=جنح بي على فيض الصدور الربيعيه
قصيد ٍ سواة الدهر وبيوته الايام=توارد هواجيسه وتتبع معانيه
ادلع به الترفات واطربّه الحكام=وتعتق به ارقاب ٍ من السيف مدنيه
[/poem]




وســـــــــلامـــــــــــــتكم