منتديات المرقاب الأدبية - عرض مشاركة واحدة

27-08-2009, 07:09 PM

بما أن أبو فهد هي المرّة الأولى التي يقرأ فيها للأستاذ عبدالله السالم

سأضع هنا بعض من نصوصه الشعرية

ـــــــــــــــــــــــــــــــــــــ

[poem=font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]

ما تشبع من السؤال وكثر تكراره =عن ضيقي المستديم وعقدة حجاجي

وين ابتهج واتعدى الضيق واسواره =إلا أنت عطني سبب يستدعي إبهاجي

عندي من الضيق ما يستعصي إضماره =لو تكتمه بسمتي يحتد في اوداجي

ينتابني الحب وانا الحاقد الكاره =ويحيط بي الخوف وانا المؤمن الراجي

خايف ومرتاب كني ف أول الغارة =والناس تقتل وراي ووحدي الناجي

عايش على اعصابي أخفي الضيق وآثاره =كني انتظر شي ياتي عجل ومفاجي

آزج ( نفسي ) بتأويلات محتارة =وأرمي على ( الآخر ) إشكالية إخراجي

لو شفت لي طفل يلعب ف آخر الحارة =يدور في بالي إنه يقصد إزعاجي

هذي السكينة مجرد معطف فاره =تخفي ضياعي وفقر ايديّ واحراجي

بيني وبين الشغب شباك وستارة =لو هبت الريح عرت خافي أدراجي

وتجي وتطرح سؤال كثر تكراره =لا بالله إلا باضيق وباعقد حجاجي[/poem]

ــــــــــــــــــــــــــــــــــــ

[poem=font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]
لا تحسف ما على مثلي حسافة =خلك أكبر من جنوني وهذياني

كنت سر وتم في يديك اكتشافه =وجه بارد لا يحس ولا يعاني

كل ما قلته عن أوجاعي خرافة =طوّفه ، مثل الكلام بلا معاني

كنت أورّدك الظما من دون رافة =وكنت أزيّف بالشعور ، وكنت أناني

وكنت .. وش باقي بعد يحتاج إضافة ؟ =المهم أنك تسلمني عناني

وش بقى بي ترغبه ولا تخافه =ما كفاك من العذاب اللي كفاني ؟

ليه تشغل خاطرك في " شي تافه" =ليه تسبل دمعك العذري عشاني

عدّني مثل أي غلطة وانحرافة =وانسني .. وارقد قرير العين هاني

اختر الدرب الطويل بلا انعطافة =لين تخفيك الشوارع والمباني

لك عليّ اعرض لك البسمة لطافة =وآحبس لك دمعتي واعقد لساني

لا تردد بين وقفة وانصرافة =خذ طريقك وارتحل .. ولاّ ثواني :

يا حياتي قبل تاخذك المسافة =خلني اشبع من عيونك في مكاني[/poem]

ــــــــــــــــــــــــــــــــــــــ

[poem=font="Simplified Arabic,4,darkred,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]
وتغيب ، ويغيب كل أبيض ، ويطفا النهار = ويضج في الروح صوتٍ ما لحزنه صدى
ادورك خلف كل اسـمٍ هنا مستعـار = واثور يائس : لابو الساحة لابو المنتدى
تدري ؟ تعلمت عقبك لعنة الانتظار = الله يعوض علينا كان كله سدى
ليليا انفض جنوني في زوايا " الحوار " = أما يضيق الصدر ولا يضيق المدى
ياللي تماديت بي والحزن سور وسوار =منهو يوقف جنون ابن التعب لا بدا ؟
اواعدك في المسا واعاتبك في النهار = وادعيك وادعيك لكن ما لصوتي صدى[/poem]

ـــــــــــــــــــــــــــــــــــــــــــــــــ

[poem=font="Simplified Arabic,4,indigo,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]

بخير جعلك طيب وجعلك بخير=مرتاح وعلومي تسرك ، مليحة

يمكن كذا محتاج لشوي تغيير=أو كنبَات البيت ما هي مريحة

وشوي يرهقني السهر والتفاكير= واستفتح الدنيا بروحٍ جريحة

وشوي متورط بكثر المخاسير= في عز ما الدنيا يديها شحيحة

أحيان لو ينصون بيتي مسايير=ما عندي اللي يشتري لي ذبيحة
والعسر يا ابن العم أبشرك تكفير=حتى نموت أرواحنا مستريحة

لولا العسر ضاعت علينا المعايير=بين القلوب الطيبة والقبيحة

كم صاحبٍ تشريه حمر الدنانير=ما تشبع أذنك من روايع مديحه

لكن ليا صكت عليك المقادير=يطلع من المتردية والنطيحة

وبخير جعلك طيب وجعلك بخير=مرتاح وعلومي تسرك ، مليحة

يمكن شوي أقشر وحظي معيثير=أركض عمر واقدام وقتي كسيحة

والسفر موجعني وكثر المشاوير=ومخالَط العالم شريحة شريحة

تعبت راح العمر كله وأنا أسير=وأخاف عاده فـ اخر السير طيحة

تضحك بها بعض الوجيه المكاشير=اللي يسمّون التشفي نصيحة

[/poem]

ــــــــــــــــــــــــــــــــــــــــــــــــ

[poem=font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]
يا عيد هذي البهارج مظهر كذاب=دواخل الناس مليانة جثث وقبور

هم يقبلونك كما السائد من الألقاب=ويجردونك مثل نص الحكي المبتور

لو تنبش شوي تحت البشت والجلباب=هربت من عاشر الاضحى إلى عاشور

يا عيد وان قابلوك الناس بالترحاب=فقط لأنك مجرد واجب مأثور

ولا انت ما عاد لك نكهة ولا طلاب=حنا كبرنا على الفرحة ولعب الدور

انت انتبه بس من يلقي لك الإعجاب=العيد للأرض والأطفال والديكور

إن كانه العيد تسلاية ولبس ثياب=فانا اعتبرني يا عيد : معيد مجبور

مثل أي عادة مديت ايدي على الدولاب=ولبست حاجة شاريها من ثلاث شهور

ودفقت وجهي على الجيران والأصحاب=وعيدك مبارك .. ومن هذا الحكي المكرور

ابلع غثاهم وانا كلي قلق واعصاب= ويزيدني ضيق ضيق بناقي المزرور

اتذكر الحال واتلعثم واصك الباب=واشوف الاشيا كذا : في نظرة من نور

الحين هالعيد وش في جعبته ؟ وش جاب ؟=إلا ابتسامات مغشوشة وفرحة زور

هو نفسه الشايب اللي فارقوه أحباب=هو نفسه الطفل ذاك ووجهه المذعور

نفس المشاهد تعاد ونفسها الأسباب=واحنا كما احنا ضحايا العالم المسعور

على الصعيد السياسي دمية اللعاب= وعلى الصعيد التجاري ف اخر الطابور

وعلى الصعيد الثقافي ما نزال أعراب= ثقافة الوهم نلبسها ماغير قشور

نبني على امجاد من مات أضرحة وقباب=وندور .. كلٍ تجاوزنا وحنا ندور

مليار وشوي ، تشخيصة وعكف اشناب= تفضنا البسملة ويلمنا الزامور

مليار وشوي ، لكنا شيع واحزاب=هذا يحرش على هذا وذاك يثور

وتروح يسعى بها النمام للمغتاب=ويحلها في الاخير القاتل المأجور

يا عيد لا طاب جرح ولا رجع غيّاب=خلني هنيا مكاني .. وانصرف مشكور
[/poem]

ـــــــــــــــــــــــــــــــــــــــ

[poem=font="Simplified Arabic,4,indigo,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]

دخيلك نسيم الشرق بين الضلوع انسلّ= يحياك ، واشعل جمرتي واعزف أوتاري

أنا أدري خضوعي لك يعد انحناية ذل=لكن ويش أسوي ذا جدى حيلي الهاري

تجي من مكانٍ كل ذكراه ناس وهل=وياتي معك طاري هله حيّ ذا الطاري

يقل الرجا في قربهم والغلا ما قل= يا صعب الطريق ليا غدا مشيه اجباري

لا من تهت في صحرا الظما وين ابا القى ظل=اهي لو بها حيلٍ كست جلدها العاري

صبرت وصبرت إلين حسيت صبري كل= تنازلت لرياح الشعر تكشف ستاري

تنشّد عن أخباري تبي قبضتي تنحل=وهي - سوّد الله وجهها - تعرف أخباري

تنفست عن جرحي وفليت ستره فل=وأنا طول هالمدة وأنا اكنّ وآداري

هذا عقد صمتي في يدين القصيد انهل=تبي تعرف أسراري ؟ خذه واعرف أسراري

إذا سور عزمي طاح عن جيشه المنفل=فأنا أستسلم أحسن لي ولا أطيل مشواري

ولا باقي إلا رحمة الله عز وجل=يشين الدهر ، لكنها حكمة الباري

جفتنا الظروف القاسية والحظوظ علل=لو أن تشتري شمعة سرى البرق سمّاري

يموت السؤال بحسرته ما لقى له حل=وعلامات الاستفهام تستنجد القاري

وأنا واقفٍ موزون في عالمٍ مختل=وذي غلطتي اللي سببت كل هالجاري

لوأني مثل هالناس خذت الحياة حيَل=على كثر ما تحتاجني تكثر أدواري

أو أني انحنيت شوي لين العصوف تزل=ما وقّفت متسمّر ، تقل نصب تذكاري

أنا وش جنيت إلا هموم ٍ تهدّ دوَل=ومهجورةٍ يذري على دربها الذاري

يا ليل الضياع أسألك بالله كيف آدل=ما شفت النجوم اللي تهاوى وأنا ساري

سريتك ما كنت أدري بطولك ، ولما حل=علي الأمر بالقوة ، سريتك وأنا داري

[/poem]

ـــــــــــــــــــــــــــــــــــــ

[poem=font="Simplified Arabic,4,darkred,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]

شما ، توسلت وجهك في دجى المقبرة=كانت ضلوعي رفات وماوراها رفات

جيت اتلاحق بقايا روحي المثمرة=لقيت كل انغماساتي رمتني فتات

شما وانا كنت قبل امارس السمسرة=كل انتباهي طهارة وانشغالي صلاة

اتذكر انا نقيس الذنب بالمسطرة=والاصل فينا نظاف وطيبين وثقات

ماننوي الاثم والا نطلب المغفرة=حتى الخيال المجرد نعتبره انفلات

هالشات شما شتات وطاقة مهدرة=ونصحى على يوم ما نقدر نلم الشتات

الشات عين الضياع وقمة البعثرة=يمزق الروح بين الصعلكة والثبات

شما تحولت لابن الليل والثرثرة=في عز ما المجتمع يرهي عليّ الصفات

لو شفت وجهي قبل عامين ما اتذكره=قبل يتشتت وقاره في زوايا الجهات

مفتون في واقعٍ هالمجتمع ينكره= يعزف على عقدة ” المنقود” والترهات

المجتمع قال : سر الرجل في مظهره=وهناك في الشات نتشظى حُفاة عُراة

المجتمع قال : ما يمكن تكلم مرة=والشات مليان يا شما من احلى البنات

المجتمع قال : أكبر عورة منكرة=ان تعترف بالعطش ، والشات عذبٍ فرات

المجتمع قال … واثر المجتمع مسخرة=له سيئاته بعد ، مثله مثل أي شات

شما : هجرنا المطر وارواحنا مقفرة=والآلة استنزفت فينا القيم والذوات

تصاغرت الارض فينا مثل مستعمرة=واختلطت اصواتنا بين اللغو واللغات

والناس صارت تجث اعرافها مجبرة=وتسيد العالم الرقمي على المفردات

هالحين من شان أحبك ما تبي مشورة= أطبع كذا حب . ( ) و/ @

الحب ماعاد مثل أول كما نخبره=هالحين حزمة أوامر برمجة / معطيات

كلٍ يجرب حروف الحب في دفتره=إن راحت : مقيط هو ورشاه ، وإن جات جات
[/poem]