السلام عليكم ورحمة الله وبركاته
بويتات بسيطه ..
هبي علي يا نسانيس المشاعر تراي
لي عام واكثر وانا على بساط الصبر
لا جيت ابل المحاني زاد فيني ضماي
وان قلت يا صغر همي شفت همي كبر
اشتال حملي واغني للسعاده شقاي
ويستاقني ما بقى لي فـ الزمان الغبر
والضيقه اللي على ما قيل ( تسكن حشاي )
استوطنت مير ما خلت بصدري ... شبر
لو كانها هينه ما كان ... بذت خفاي
جرحي بها ما برى.. كسري بها ما جبر
عجزت الاقي دواي ان جيت ادور دواي
ضاق الفضا وانكفا على الوصايا حبر
والرفقه اللي ثمان سنين حلت سماي
لا عاد منها علوم وما وصلني خبر
ما عاضني فـ الحقيقة طيب معدن وفاي
وأثر الليالي تجارب والتجارب عبر