[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
هاجس الشعر يوم أحكمت تقيـيده = أسفهلّـيت بجلوسي وبقيامي
وأن طرى طاري الشعر وقواصيده = قلت يا هاجسي وش مصدر إلهامي
حسبي الله عليه أخلـف مواعيده = وساقنـي سوقة الرويان للظـامي
والله الله يا كاشـه وتقصيـده = والله الله ياْحـروفي ويا أرقامي
صامل الهرج لاآزيده ولا آعيده = وما تجف الصحف قبل أرفع أقلامي
وغالي الكيـل لا بالله با آزيـده = لو وراي البحـر والمـوت قدّامي
يا مسجّل غيابي قبل تمديـده = قم وسجّل حضوري وأركـز أعلامي
كل عهدً قديمً حان تجـديده = إنطلـق يا طلـق والاّ إرم يا رامـي
من جبال الوطن نبدي على بيده = لو يكـون الوطن شاسع ومترامي
واديً فيه صيـد ولا أنقنص صيده = وواديً ماش صيـد وزوّد آثامي
والجبل شفت حيـده ماهي بحيـده = لو وطـاها السفيـه تـروّح أقسامي
أختلف كل شي وقـرّب بعيـده = ماهي بسـالفة متقــدّم ونامـي
الزمن ترتفـع رجله وتاطـى إيده = إيده اللي من أوّل جرحهها دامي
ووجهه الشين بان ومن تجاعيـده = أتـّضح كل شي وزالت أوهامي
ما أشغلتني هـروج مطـوّع بريده = أدري إنـّه يحب المشمش الشامي
لا يجي طامـي وتكثـر مراديده = عندنا ماله الاّ إنطـمّ يا طامـي !
يلتـوون الجحلّـط وأمّا أنا سيـده = متـشح بالنقا ومثبــّت أقدامي
صافطً راعـي الذود ومفـاريده = قد رعيت البشر قـدّام الأغنامي
لو طلبت العـرب في البازل وقيده = جابه عتيـبي وقحـطاني ويامـي
بس من قاصي العـربان ما آريده = بنــدقي بنـــدقي وحـزامـي وحزامـي
قبل شـرهات أبو زيـد ومناقيـده = وبعد خبث وبجـاحة طلعت اللّامـي !
وارد الطيـب ما غيــّر مواريده = ألتزم صحّ لأن الموقف إلـزامي
ووارد العيـب لا صيده ولا فيده = منعمـي منعــمي ماهو بمتعـامي
هكـذا الناس كلً له تقاليـده = قبل نسمـع بجـدّاوي ودمـّامي
وبعدها فيــه تسخيــنه وتبـريده = خلّت الوجه بارد والقفا حامي
لا أنتهى العام فإحسب كم مواليده = تاجـد الثلث داخل دار الأيتامي !
والسبب ما يفيـد الحيـن تحـديده = دام ذبـح الشيم بالذبح الإسلامي
وأنذبح عيد والسبّه هوى عيـده = علّـمو ساميه تـرفق على سامي
لا تحاول تحطّ الحبل في جيده = دام مافيـه لا قاضي ولا مْحـامي
سرّ هارون ما علّم به زبيـده = كلمّا صحصحت قال إرجعي نامي
حكمه وحاكـم وحكـم ومقاليده = وهيلمـان وحمـايه والله الحـامي
جا على البال ذكره قلت توريده = مكسـبً لأصدقـاي وغبن لأخصامي
أستـوى العلم يا عمـّه ويا سيـده = خلّ سبـّابتي تزعل على إبهامي
قلت لا والله إلاّ فـرصه سْعيده = وجيت أمسّ الحكا ما آمسّ مرزامي
تحت بند الصحيح وبند تفنيـده = وفوق حرب النجوم وحرب الأسامي !

[/poem]

من الذكـاء متابعة طاش ما طاش
........ وأكبر غباء إنـك تتابع خـواطـر !