للجميل / بدر محمد السبيعي
حسبي على اللي حطني بين قوسين
من بين كل النـاس سبـب عنايـه
اختصنـي بالهـم والغـم والبيـن
تقـول كنـي مرتكبـلـي جنـايـه
اي والله استاهـل منـول وهلحيـن
هويـت مـن لايستحـق الهوايـه
عطيته اكثر من حقـوق المزاييـن
واسرفت له بالحـب لاخـر نهايـه
مشٌيت حبه فـي جميـع الشراييـن
صورته في قلبـي وتمشـي معايـه
بنيت له في داخـل القلـب برجيـن
ورفعت له من فوق الابـراج رايـه
ثم بعدها ورانـي الخاطـر الشيـن
من قلب ٍ اسود مثل لـون العبايـه
وارسل سهوم ٍ تنصف القلب نصفين
سهم ٍ يناطحنـي وسهـم ٍ ورايـه
تقول كني مـن كبـار المعاديـن ؟؟
ضوٌق علي الارض واضوق سمايه
عسـاه تلعبـه كبـار الشياطـيـن
اللـي خلقهـا الله بلـيـا هـدايـه
ويعيش في دنيـاه مابيـن ناريـن
واشفي غليلي منه واروي ضمايـه
خلاص من درب الهوى والمحبيـن
خلاص خذنا مـن دروسـه كفايـه
اي والله استاهـل منـول وهلحيـن
هويـت مـن لايستحـق الهوايـه
...
|