حسب توقيت المحب اللي غلاه يشده
لك يابوخالد حبيب المملكه غاليها
غيبتك يوم الغياب نفصله ونعده
السنه ماباقي الاّ ينطوي تاليها
ودارنا من حدها الشرقي لساحل جده
تنتظر طلة سموك والوصول إليها
والمدن في شوقها مثل البحر في مده
ما يريحها سوى صوت المآذن فيها
ويوم بشرنا المبشر بإنفراج الشده
شكرت كل النفوس وهللت باريها
والوطن من حده القاصي ليا أقصى حده
بشر الدنيا من أقصاها ليا دانيها
وبشر الطفل الصغير امّه وأبوه وجده
والعيون من الفرح ماكفكفت صافيها
والنظر حسب إتساع الشوف يوم امده
مايشوف الا الكفوف اللي دعت واليها
شفت ظلع طويق يدعي حالته منهده
يلتفت صوب الرياض ويفتقد راعيها
قلت قلبك من حجر وتحن له وتوده
كيف عاد قلوبنا اللي شوقها يدعيها
سيدي سلمان أخو سلطان جزل المده
حبه قلوب الخلايق كلها ماليها
وقفته مع راعي الوقفات طول المده
نادره في حاضر الدنيا وفي ماضيها
والله انّه بالوفاء والطيب يتعب نده
سيرته مضرب مثل لعيالنا نرويها
الوفاء لو هو رجل زاره وقبل يده
وقال وقفتك الشهيره ما أحدٍ ناسيها
ويحفظ الله مملكتنا والصحيح نعده
والملك نعم الملك زيزومها حاميها
ناصر تراحيب
قصيده جميله لأبعد الحدود الله يوفقك ولاهنت يامبدع
|