على هونك ترا لا زلت تنقز بـأوّل المشـوار
عسى تثبت قدم رجلك علـى درب النجوميّـه
أخذ مني نصايح تنفعك مـع معشـر الشعّـار
وتشوفك نجم ما شافوا من نجوم السماء زيّه
وتصبح شاعر المليون مدري شاعر المليـار
وتظهر لك مع وجيه العرب سمعه و جاهيّـه
بداية رحلتك يمكـن تعرقـل ميـر لا تنهـار
تعرّض للهوى .. وأكـل المطبّـات الهوائيّـه
تنحنح للهبوب وجرّ صوتك مع حمـام الـدار
ولا تفرض على صوتك مشاعـرك الحقيقيّـه
لا بدّ أنك تنافق ليـن تفهـم لعبـة الشطّـار
ولا بدّ أنك تجامـل فـي العلاقـات الحميميّـه
وهايط من يردّك لا تهايط .. وأنت دمّك حـار
لا زدت هياط .. زادت نشوتك سعره حراريّه !
ولو صكوّا عليك أهل الصحافه ماعليك حصار
أخـذ جولـه فـي كـلّ المنتديـات الأدبيّـه
وعلّق صورتك فـي ناصيـة بوّابـة الـزوار
ولمّعهـا وبروزهـا بديـكـورات ورديّــه
وسجل بإسم ثاني وأنفخ الأوّل ثمـان أمـرار
ترا القانـون مـا يمنـع عليـك الإزدواجيّـه
بفزعه من عيال العمّ وإلاّ من عيـال الجـار
تطيّرك الشلـل فـي مسـرح ٍ كلّـه شلليّـه
ولو نفرض على الخط السريع نحط ّ لـك دوّار
توقّـع لا تروّعنـا بسرعـتـك الجنونـيّـه
ودوّر للمدوح الزايفـه فـي رحلتـك معبـار
وخلـك بهلـوانـي والقصـايـد بهلوانـيّـه
وحضّر مع طوال العمر بالطبلـه وبالمزمـار
وطبّل للبشـوت وزمّـر وهـاذي ضروريّـه
ولا تنسى نصيبك وأنت حرّ ومن بيوت أحـرار
ولو راحت على قول المثـل شحـذه علانيّـه
لا تقبل غير ( رنج ) ولو يحدوّنك على الفكسار
ترا الفكسار تال الوقـت مـن حـظّ العليميّـه
وبكره يعزمنّـك طالبـات الجامعـه بإصـرار
وتقيم أصبوحتك في جوّ مفعـم بالرومانسيّـه
وتشرّفهن بصورة تجمـع الجمهـور للتذكـار
هذا غير العلوم اللي عـن التصويـر مخفيّـه
ويمكن يعرضون أصبوحتك في نشرة الأخبـار
خبر عاجـل علـى كـلّ القنـوات الفضائيّـه
عطيتك كل ّ ماعندي ولا أدري عنك وش تختار
يا بو شهره ترا الشهره لها طبخـات سريّـه
أخصّك بالنصيحه والرجال اللـي لهـم مقـدار
بعيد الشكّ عنهم وأنت هاذي لـك خصوصيّـه
يقولون العرب ثلثين شعّار النبـط فـي النـار
وأنا ما أقول غير الغيب علمه عنـد واليّـه
الله يبض وجهك عزالله ماقصرت والله إنها ذهب عيار واحد وعشرين
دمت بخير ياسداح المرجله والشعر
|