السلام عليكم ،

يا حسبي الله على التوقيع
بعض البويتات يرفضها


خاطره بعد حوار خاص جدا ،،


[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]
على هونك ترا لا زلت تنقز بأوّل المشوار=عسى تثبت قدم رجلك على درب النجوميّه

أخذ مني نصايح تنفعك مع معشر الشعّار=وتشوفك نجم ما شافوا من نجوم السماء زيّه

وتصبح شاعر المليون مدري شاعر المليار=وتظهر لك مع وجيه العرب سمعه و جاهيّه

بداية رحلتك يمكن تعرقل مير لا تنهار =تعرّض للهوى .. وأكل المطبّات الهوائيّه

تنحنح للهبوب وجرّ صوتك مع حمام الدار=ولا تفرض على صوتك مشاعرك الحقيقيّه

لا بدّ أنك تنافق لين تفهم لعبة الشطّار=ولا بدّ أنك تجامل في العلاقات الحميميّه

وهايط من يردّك لا تهايط .. وأنت دمّك حار=لا زدت هياط .. زادت نشوتك سعره حراريّه !

ولو صكوّا عليك أهل الصحافه ماعليك حصار=أخذ جوله في كلّ المنتديات الأدبيّه

وعلّق صورتك في ناصية بوّابة الزوار=ولمّعها وبروزها بديكورات ورديّه

وسجل بإسم ثاني وأنفخ الأوّل ثمان أمرار=ترا القانون ما يمنع عليك الإزدواجيّه

بفزعه من عيال العمّ وإلاّ من عيال الجار=تطيّرك الشلل في مسرح ٍ كلّه شلليّه

ولو نفرض على الخط السريع نحط ّ لك دوّار=توقّع لا تروّعنا بسرعتك الجنونيّه

ودوّر للمدوح الزايفه في رحلتك معبار=وخلك بهلواني والقصايد بهلوانيّه

وحضّر مع طوال العمر بالطبله وبالمزمار=وطبّل للبشوت وزمّر وهاذي ضروريّه

ولا تنسى نصيبك وأنت حرّ ومن بيوت أحرار=ولو راحت على قول المثل شحذه علانيّه

لا تقبل غير ( رنج ) ولو يحدوّنك على الفكسار=ترا الفكسار تال الوقت من حظّ العليميّه

وبكره يعزمنـّك طالبات الجامعه بإصرار=وتقيم أصبوحتك في جوّ مفعم بالرومانسيّه

وتشرّفهن بصورة تجمع الجمهور للتذكار=هذا غير العلوم اللي عن التصوير مخفيّه

ويمكن يعرضون أصبوحتك في نشرة الأخبار=خبر عاجل على كلّ القنوات الفضائيّه

عطيتك كل ّ ماعندي ولا أدري عنك وش تختار=يا بو شهره ترا الشهره لها طبخات سريّه

أخصّك بالنصيحه والرجال اللي لهم مقدار=بعيد الشكّ عنهم وأنت هاذي لك خصوصيّه

يقولون العرب ثلثين شعّار النبط في النار=وأنا ما أقول غير الغيب علمه عند واليّه !
[/poem]


وسلمتوا ،،