الغالي فهد فيصل

الحقيقه انك تستحق الشكر على هالموضوع التفصيلي المميز بحق


اسمح لي اشارك هنا بهالتعبير ..


يا طير غرّد للهوى وأنفـض الريـش
لازالـت أنسـام الهبايـب لطيـفـه

والجوّ هادي لو دخل فيـه تشويـش
ومشاعـرك ماهيـب دايـم رهيفـه

لا يختلف لونـك فـدوك الخفافيـش
اللـي تحـت جنـح الغـداري لفيفـه

ما تنتهي نشـرة علـوم المطاريـش
واللي معـه علـم ٍ جديـد ٍ يضيفـه

الغاويه جاء مـن وراهـا دراويـش
واحدهم أسود وجه .. وأسود صحيفه

تنكـروّا للجـار والملـح والعـيـش
ما عندهـم غيـر الخيانـه وظيفـه

سلامة الحدّ الجنوبـي مـن الطيـش
ومن العبـث والشرذمـات الضعيفه

مدري فلول الشرّ تنقز علـى ويـش
وشيطانهـا الاكبـر يصيـح لحليفـه

يا الحوثي اللي معك رشـاش حتّيـش
هات الرصاصه واخـذ عنهـا قذيفـه

المملكـه ماهيـب مرعـى كداديـش
اللـي تناهـق بيـن جيفـه وجيفـه

مهبط وحي ربّي علـى سيّـد قريـش
نقدّسـه .. ومقدّسـاتـه شريـفـه

ما فيه ضيفة قات .. وضيوف تحشيش
و الدين قاصـر والمذاهـب سخيفـه

لا والله إلاّ دار روس المـداغـيـش
يكـرم معزّبهـا ومحشـوم ضيـفـه

يا قايد الشرطـه ويـا قايـد الجيـش
أمانـة ٍ مـن بينـكـم بالنصيـفـه

حدّ الوطن ماهوب مسـرح تناويـش
وأنتـم كفـو للمعضـلات الكليـفـه

لا ترحمـون مكبريّـن الطرابـيـش
أبـدوا لهـم فـوق الجبـال المنيفـه

تعيـش يـا دار المناعيـر ويعيـش
اللي وقف مـن دون حـدّك بسيفـه



وسلمت ،،

..