أوتوجراف للمبدع / مشعل فالح الذيابي :-
بنتـي الحبيبـة والعزيـزة منيـرة
طلبتي اهدائي بعـد كـل ٍ اهـداك
وهاضت قرايح هاجسـي بتعبيـره
هاتي اوتوجرافك وفي صفحته هاك
اهداء ابوك اللـي سكنتـي نظيـره
واللي على اسم اغلا المخاليق سمّاك
اللـي ليـا نمتـي عيونـه سهيـرة
يدعيلك ان الله مـن الشـر يحمـاك
لولاك ما خاض الامـور العسيـرة
ولا كابد الدنيـا والاتعـاب لـولاك
الله عليـك يديـم عـزه وخـيـره
وستـره وعافيتـه بدينـك ودنيـاك
ويفتح لك ابواب السعـد والبصيـرة
ومن شر كل اللي منه شـر ياقـاك
صحيـح تـوك يامنيـرة صغيـرة
ما لوّنـت سـود الليالـي نوايـاك
لكنّ فيـك احـلام عمـري كبيـرة
وليا كبرتـي يكبـر الحلـم ويّـاك
وانتـي بتحقيـق الامانـي جديـرة
يجذبك دين ويدفعك طيـب مجنـاك
ابغاك لربوعـك ولاهلـك سفيـرة
باخلاقك ودينك وعاطـر سجايـاك
وابغاك في لبسـك وقولـك ستيـرة
وليا مشيتـي نظرتـك يـم ماطـاك
وخطوتك عن باب القصيرة قصيرة
ما ابغى يقال احد ٍ تحلّاك واوحـاك
وعينك عن عيوب الخلايق ضريـرة
وخافقك عن زلات الاقـدام ينهـاك
والصدق طبعك فالعلـن والسريـرة
ونهج الصحابيات نهجـك ومبـداك
وابغـاك دوم لوالدينـك ذخـيـرة
بالبر واجر البـر ماهـوب يخفـاك
وترديـن غبـات العلـوم الغزيـرة
وتعانقين المجد مـن فعـل يمنـاك
وابغاك الاولى فـالادب والاخيـرة
فالهرج كثر الهرج يبـدي خفايـاك
تجملي بالصمـت فـي كـل ديـرة
والابتسامـة لا تفـارق محـيـاك
وتكفين ياعنـق المهـا المستذيـرة
حذرا يزين مـن التفافيـق مرمـاك
تـراك قايـدة الظبـا فالمسـيـرة
وما للظبا مجناب عن جرة خطـاك
تجنبي ممشى الـدروب الخطيـرة
واخذي طريق الدين لا حارت ارياك
حتى يجي لك مع هل الدين سيـرة
وكل ٍ يقول ان جا مجالك وطريـاك
يابنـت مالـك فالصبايـا نظـيـرة
الله يعز اللـي علـى العـز ربّـاك
...
|