نبضة ولاء
قيلت في عام 1426 هـ
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=1 align=center use=sp num="0,black""]
علمنا يا علمنا ارواحنا دونك جلايب سوق= نبيع ارواحنا لاجلك ولاجل بلاد اخو نوره
علمنا يا علمنا فوق دايم فوق دايم فوق= موشّح بالحسام وكلمة التوحيد مسطوره
علمنا لا يهمونك صعاليك الغدر والبوق= يصف الامن دونك والحرس والجيش طابوره
رجال الامن حنا والمخرب منخره مدقوق= نسوق العمر لين نجيه وندقه على زوره
نجازف بالعمار وفالمواقف فعلنا مرموق= وراء نايف نسير ونستنير الشور من شوره
خلقنا الله درع ٍ للبلاد وللمخرب عوق= يموتون العدا وكبودهم بالمر ممروره
نسوق ارواحنا للموت دونك ياعلمنا سوق= وميتنا يموت شهيد وله البيض منشوره
هذاه اكبر شرف واكبر وسام يناله المخلوق= ليا شفنا دمانا فدوة ٍ للدين منثوره
هذاه الموقف اللي يظهر السابق من المسبوق= وتال العمر موت وحفرة ٍ فالارض محفوره
لا لا بعض المواقف ماظهر بين الرجال فروق= ولا بان الشجيع من الجبان ولا برز دوره
يا ينبع لا يهمك غن من زين الطروق طروق= يجاوبك الجبيل من الخليج وراس تنوره
ترى هاذي سحابة صيف لو فيها رعد وبروق= تمر ولا تضر وزمرة الشيطان مدحوره
يجيهم يوم ٍ اسود ياخذون عقابهم مطبوق= سواده من سواد وجيههم بالشكل والصوره
خفافيش الدجى مهما تخفوا وضعهم مزنوق= شف الشعب السعودي كيف سوّى ضدهم ثوره
وقفنا صف واحد في وجيه قـليّلين الذوق= بفم واحد نقول اعمال مرفوضه ومنكوره
وانا شاعر وجيتك بالخبر من مصدر ٍ موثوق= ابو متعب تعهد باقتلاع الشر بجذوره
وابو خالد يقول الخاين اللي نطرده ملحوق= نبي نقضي عليه وراية الاسلام منصوره
وانا ماقمت اغني من طرب معجبني الطاروق= اغني شفت شي ٍ يظهر الرجال من طوره
وانا ماقمت اغني فالعذارى لابسات الطوق= اغني فالبلاد اللي حياته منه مغموره
بلاد ٍ كل ما غنيت ياخذني عليه الشوق= بلاد الامن والايمان والقرآن دستوره
بلاد ٍ لو عطيته كل ما املك له علي حقوق= اموت وباقي ٍ في ذمتي للدار فاتوره
على ارضه يامنون الناس لا سارق ولا مسروق= يروحون ويجون نفوسهم بالامن مسروره
بامان الله نرقد ونغرق بسباتنا ونفوق= على صوت المؤذن كل فجر ليا بدا نوره
علمنا يا علمنا ارواحنا دونك جلايب سوق= نبيع ارواحنا لاجلك ولاجل بلاد اخو نوره
علمنا ياعلمنا فوق دايم فوق دايم فوق= موشّح بالحسام وكلمة التوحيد مسطوره[/poem]
يتبع ..
|