السلام عليكم ورحمة الله وبركاته
كل عام وانتم بخير
بعد هالغيبه اتيت وكلي طموح ان تحوز
هذه المتواضعه على الرضا والاعجاب

( ابيات تعسرت )
اتخيل الغربه
وفاضت بي العين
من دمعها
وشلون لو كان واقع
/
/
امسي على
عذرك واصبّح على الجرح
كن العشا
عذرك وجرحك لي ريوق
مديت لي
حزنك وشحيت بالفرح
واسرتني
لليل مع خوة الموق
تدري وش
اعظم شيء ٍ يصدع البرح
دمعة رجل
لا صار بالحيل مخنوق
/
/
يا شف نفسي لا التفت بالنظر لي
فكره معاي وكن ما هو بيمي
ان كان قلبك بالهوى مايل ٍلي
يا وجد حالي آه يا زود همي
وان كان قصدك هو عبث بس قلي
والله لا احطك بالعبث وسط كمي
/
/
لا تحسب اني في غيابك تذللت
مثل الزقارة بعد كيفي ادوسك
/
/
تبكي ودمعي
مغرق ٍ لي عيوني
من هو يواسي
البعض والكل يبكي

( كسير الساق )

ادورني على مابي وانا من كومة احزاني
على خضر الطعون اللي ربت يا ويش هي ذنوبي
تعبت اطرد سراب ٍ من عرفته ضاع عنواني
كسير الساق واقدام الشقى كم تقطع دروبي
من اول كنت اشيل الحزن فوق الحزن بامتاني
ولكن صرت في عين الحزن ذالحين يا دوبي
تبّدل حالنا والحال من قل العطا فاني
على كسر الضلوع وقاهر ٍ بالحيل منسوبي
زبنت الحظ لكن حظي اعن الفرحه اقفاني
يشرقبي على همي وحزني صاير غروبي
اسامر ليل ونجوم الليال اشكال والواني
ادور نجم ليل ٍ لا شكيته يستر عيوبي
غريب ٍ في زمن عاثر يا لو تدرون باوطاني
ضلوع ٍ عاريه وهمومي استار ٍ على جنوبي
خذاني الهم طفل ٍما عرفت انطق على لساني
وصرت الشايب اللي ضاع عمره دون محسوبي
لفيت الدهر انا عاني وبفارقه انا عاني
رضيت ابما خسرت وراضي ٍفي كل مكسوبي
بحكم الوالي الدنيا مشت يا خير ما جاني
يصيب العبد بالدنيا على ما كان مكتوبي
تحيتي لكم
حســــــ ن الـــــ وافـــــــ ــي

امسي على عذرك واصبًح على الجرح
كن العشى عذرك وجرحك لي ريوق!
مديت لي حزنك وشحيت بالفرح
واسرتني لليل مع خوة الموق
تدري وش اعظم شي ٍ يصدع البرح
دمعة رجل لا صار بالحيل مخنوق