[poem=font="Simplified Arabic,4,gray,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يا صديق الامس لي كبد وتعاف = وبين ضلعيني نبض قلبٍ عقول!
لو لزمت الصمت .. نبذاً للخلاف= عارف إن السالفة يمكن تطول!
الخطا بيّن .. ولكن ما يشاف= والعذر مقبول .. لو ما له قبول!
والتشابه بيننا فـ / الاختلاف = لو لنا نفس المشاعر والميول!
قبل تذنب .. كانت عيوني نظاف = وبعد ذنبك .. صارت بحاجة ( غسول ) !
‎​اغسل عيوني بصدقك ، لا تخاف = ما اسمع الواشي .. ولا هرج العذول
الخطا نفسه مهو فـ / الاقتراف= الخطا : تنكر خطاك ولا تقول !
لا فطنت لغلطتك .. حط اعتراف = انت غالي ، والجفا صعب الحصول!
معتماتك بيض .. وثقالك خفاف = وحَسْنتك تبقى .. وزلاتك تزول!
والهقاوي فيك ما تِلْحق خلاف = والاماني منك ما تعرف ذبول !
وانت خابرني لو سنيني عجاف= ما تعب متني من ثقال الحمول!
لو شكى الوادي همومه للضفاف = ما شكيت الهم للي ما يطول!
وانت طايل فـ / العيون وفـ / الشغاف = والبشر بيني وبينك ما تحول!
والمشاكل ما هي نهاية مطاف = يمكن تخلّف أثر .. لكن خجول!
لا لقينا الحل كان الائتلاف = لكن ان بعض المشاكل فـ / الحلول!![/poem]