في الصميم للمبدع / فهد الزعبي
بالله يـا أهـل الساحـة الشعـريـة
أصغـوا مسامعكـم إلــيّ شـويـة
عنـدي قصيـدة ماطرقهـا قبـلـي
أي شاعـرٍ فـ/ الكـورة الأرضيـة
وإمـا تنـال إعجابـكـم برضـاكـم
وإلا تـنـال إعجابـكـم جـبـريـة
واللي يعـارض يستريـح ويجلـس
تحـت مظلـة ( رافـض الحريـة )
خصوصاً إنـا فـ/ الزمـان الحالـي
نعيـش حالـة شـعـر هستيـريـة
نسمـع قصايـد بـس مانحفظـهـا
لا بـه شعـور ولا مشاعـر حيـة
يجيـك شاعـر حـادرٍ لــه وادي
وإعلامنـا معطـيـه مـيـة مـيـة
وصـف الكـلام ولصمقـه لصماقـة
وسمـوه نجـم الساحـة الشعبـيـة
وضاقت مجلات الشعر بـ/ صـوّره
وفـي كـل ليلـة أمسيـة رسميـة
ماهوب شـرط إن القصيـدة جزلـة
عـادي لـو إن أفكارهـا عـاديـة
لو ( يحلب غيوم السما ) بـ/ الطاسة
ويسقي بهـا مـن يجهـل الرمزيـة
و( يرسم من الشارع ونور الموتـر)
محبوبتـه بـ/ ألـوانـه المائـيـة
أو ( يمتطي ظهـر السفينـه ) كنـه
خيـال صفـرا فـي نهـار الهـيـة
أهـم شـي يكـون غاسـل وجهـه
إمن الحيـا وإمـن الخجـل موليـة
ويضحك على جمهـوره المتعطـش
لـ/ طلتـه وأشـعـاره السطحـيـة
والله مـدري مـن عليـه الشرهـه
تنسـاق لـه مسمـوعـة مرئـيـة
نشره علـى الجمهـور وإلا نشـره
علـى الشعـر والنقلـة النوعـيـة
بـس الأكيـد إبداعـنـا لايلـغـى
بـ/ سبـة أهـل النظـرة الدونيـة
..
|