عملاقه للفذ / فيصل السواط
ياسادة الشعـر ، الأدب فالشعـر منهـاج الأمـم
يانكتـب الشعـر بمواثيـق الأدب .. ولاّ بـلاش
ماكـلّ شـي يمـرّ فالخطّـر ، نسلّمـه القـلـم
حبر القلم غشّاش بعض احيان .. وعلومه غشاش
تبقى .. إرم ذات العماد .. بعين خلـق الله ، إرم
مدينة قصور ، ومواطن خير ، وزهور وفـراش
لو انّ فيها عيـب واحـد ، بـاذكـره ولا جـرَم
حرّاسهـا واجـد ، وسيّدهـا كثيـر الارتعـاش
والسور عالي ، واصغر الابـواب مايقبـل قـزم
ماعاش فيها ، غير عملاقيـن بقلـوبٍ بشـاش
واربعمية فارس ، وبنت حصان ، والباقـي خـدم
يليّمون اللي هبوب الريح جت به .. في خيـاش
والعزّ ، شال الساريه .. والساريه ، شالت علـم
والعقل ، حط المشكله .. والمشكلة ، حطت غباش
والشتم سهل ، وكل بـن رجّـال بلسانـه عظـم
سلاح من ماله سلاح اخلاق .. وعظامه هشـاش
والدنفسه ، والحكحكه ، ماخلّـدت شاعـر علـم
يفقد مع انسانيّته ، مواهبـه .. ويـروح مـاش
والحقد ، ماله في صدور اهل الوفـا موطـأ قـدم
يستوطن الصدر الخراب .. ولا تمكّن فيه عـاش
والضيق ، مهما كان .. ماعمره على دوله حكـم
عابر سبيل .. تمرّ به قوافلـه فـي كـل جـاش
يلخبط اوراق الضميـر العـفّ .. ويخلّـف ألـم
لكنّ ماتكسر مساحيـه .. الغصـون امّ العشـاش
والآدمـي مهمـا تجنـب فالخطـا ، دم ولـحـم
مرسل ومستقبل .. مصوّر ومتصـوّر بالفـلاش
لكن ضروري يدمح الاخطاء .. من بـاب العشـم
لو يضمحّل القرم في عين الزعل ، ويصيـر لاش
والطبع غالب .. والتطبّـع يغلبـه لامـن هجـم
لاصار طبعه شين ، في تطبّعه .. خدمـه بـلاش
لابد مايستوعب الانسـان ، وش معنـى : نـدم
ولا بد مايستوعب الانسان ، وش معنى : نقـاش
لـن النقـاش ، يعلّـم الانسـان يبقـى محتـرم
ولنّ الندم ، مصالحة نفسه عليه .. بـلا هـواش
والشهم ، لو دارت رحا الدنيا على قلبه .. شهـم
كفّ التسامح ، مايمسّحهـا علـى حـد الفـرْاش
والحب بين الناس .. مايولد ، علـى رز ولحـم
يولد ، من بطون المواقيف ويثير الاندهـاش
وعدم توافق آدمـي مـع آدمـي ، ماهـو لغـم
يفجّر العشره مابين الناس .. وتـروّح طشـاش
ياآدمـي والشـك عـمّ العالـم ، إلاّ مـن رحَـم
خذها نصيحه وافيه ، من قلب مايكرهك .. كـاش
مهم تبقى انسان واثق فـي ضميـرك ، والأهـم
انّك تعرف ان الحياه بكبرهـا .. قطعـة قمـاش
...
|