[poem=font="Simplified Arabic,6,darkblue,normal,normal" bkcolor="transparent" bkimage="" border="solid,4,darkblue" type=2 line=0 align=center use=ex num="0,black""]
النفس دايم للخطايا اماره=محدن عن الزلات بمزكيها
أحيان اجاهدها واصد الغاره=واكثر مرار اطيعها وارضيها
اكره خطا نفسي واحب انكاره=مابرهن الزله وكابرفيها
وابليس متقن فالغرور ادواره=على أدم أبو ابنادم امشيها
يسوقنا للذنب تاره تاره=والناس لولا بليس من يغويها
بوار والدنيا معه بواره=ماتلحق أولها والاتاليها
كم واحدن فيها معمر داره=قفا وداره ماتمتع فيها
أمسا جنازه في يد القباره=روحن خذاها الله وهو واليها
يومن به المولى العزيز اختاره=والروح لاجا الموت من يذريها
مابين جنات الاله وناره=من قدم الحسنه يبايلاقيها
نهار به تحصيل كل اتجاره=ياراعي الحسنه تجود فيها
كلن حسب زرعه يحوش ثماره=واللي غرس له غرستن يجنيها
على السراط اروحنا مراره=والنار حسب اعمالنا نعديها
عساي مع من خاتمت مشواره=من خاتمتها خير من ماضيها
لا جا نهار الميمنه ويساره=بيض(ن) صحايفنا نماري فيها
ياغافر الزلات با الكفاره=وعوراتنا بثيابنا موريها
عناثقيل الذنب حط اوزاره=وثقل الخطايا بقدرتك ترميها
وسقنا على دربن تشع انواره=ونفسن تضل بقدرتك تهديها
عبدن رجا الله واحتما بجواره=والناس لاخايف والاراجيها
من صد عني ماتقصا أخباره = والناس عز أنفوسها مغنيها
والآدمي مائن مهين اطواره =له قوتن حكم الدهر يفنيها
كل حسب قدره وله مقداره=بصدورنا لو كان ما نطريها
والصدر قبرن يتعب الحفاره=وصدور لو تنبش بدا خافيها
ماتتعب العساس والسباره=شفافتن يطمع بها قاريها
يفرح بها الي والمن منشاره=على النمايم ذمته مهفيها
طيرن يحوش الشر في منقاره=على وخام الغيبه مضريها
أن هامه السربوت نط أجداره=وان جاته الضيفان مايقريها
قبيض قرشه مايفوت أصراره=مشفوح بالأولى وماياليها
تاجر وناره ميته بوجاره=بدري عساه يروح ويخليها
يفنا وراع الطيب تبقا أذكاره=سوالف اهل الطيب مع راويها
والوقت هذا من يشق غباره=كلن يقول القوس انا باريها
والفرق في سبك الذهب وعياره=والا التنك ماونست شاريها
وعند الولي خاف الزمن واسراره=هو موجد العله وهومبريها[/poem]