بين الضمير الحيّ والخاطـر الشيـن
معادلـه .. منتوجهـا وش يسـاوي
حاولت مير أزريت في جمع الأثنيـن
ما يرحم الأوّل .. والآخر مـا يـاوي
تكسرنـي الدنيـا ويجبرنـي الديـن
وآقف على حيلي وأطيـح متسـاوي
تقـول لحجاجـي مركّـب جناحيـن
يوم انطلق مثـل انطـلاق النـداوي
أجامل اللي يعتـرض لـي بحرفيـن
والابتسامه فوقهـا الصمـت ثـاوي
و من كثر ما أجاوب قنيب السراحين
أصبحت ضمن حسابهم ذيب عـاوي
شاعر ولي في الشّعر وجهة نظر عين
لديّتهـا مـع مبعـديـن الهـقـاوي
يا وقتنا المنّـان رايـح علـى ويـن
رميتنا فـي غبّـه .. مـن المنـاوي
كثرت رجاوينا على العسـر والليـن
وزادت دعاوينـا القديمـه دعـاوي
من دون حزب الله وحزب الشياطيـن
جـات المطمّـه بإختـلاف الفتـاوي
هـذا يحلـل كـلّ عـزف المغنيـن
وهذا يحـرّم عـزف كـلّ الغنـاوي
كـل ٍ يقـول أنّـه يسـنّ القوانيـن
ثوبه على قدّه .. وبشتـه حسـاوي
موجة فتاوي وأكثر النـاس مفتيـن
روايـة ٍ وحــده وتسعـيـن راوي
مثواك يا بـن بـاز وابـن عثيميـن
في جنة الفـردوس بأمـر ٍ سمـاوي
ندعي لكم ونـردد آميـن .. وآميـن
فـي فقدكـم زادت علينـا البـلاوي
غبتـوا وعيّـت لا تقـرّ الموازيـن
ركب إختلاف الراي سارح وضـاوي
لا شكّ مـا أذمّ الشيـوخ المياميـن
ولا اقول فيهم شيخ بالشرع غـاوي
مشكور مسعاهم على المذهب الزيـن
نلقى بهـم لجـروح الأمّـه مـداوي
الله يوحّدهـم علـى نصـرة الديـن
ويعزّهم رغـم إختـلاف الفتـاوي !
شعر بمعنا الكلمه لغه وخيال وعاطفه لله درك
صح لسانك بقدر مالك في قلوب محبيك ياخي
تحياتي لك
|