للمداعبة ..
لي صاحبٍ عانيت منه الأمرّين
إلى التقينا قال خلك شبابي
أغيب عنه أسبوع والا أسبوعين
وارجع عليه وما درى عن غيابي
وأنا لو انّه عني يغيب هالحين
دمعي يغرّق غترتي مع ثيابي
أحن له واشتاق له والغلا شين
بس المصيبة صاحبي ما درى بي
أزهم عليه السبت ويرد الاثنين
وإن قلت أبيك تمرني قال : ماااابي
مطنوخ .. لكن لو طلبته ريالين
يصير جوّه بـــ اتجاهي ضبابي
والمشكلة في البنك عنده حسابين
وأنا من الطفرة تسكر حسابي
لا جا يسافر .. راح مدري على وين
وليته فـــ مره بس يكسب ثوابي
أما على باريس والا لـــ برلين
لكن سماي معلقة في ترابي
إن رحت للبحرين ما اخذت يومين
وإن جيت أروح القاهرة : يا خرابي
أجلس وأحسّب فالمصاريف شهرين
وإن كان زادت يمكن أفقد صوابي
ويا صاحبي ما ودي تقول : بعدين
ودي تحس بضيقتي واغترابي
حرام تتركني كذا بين قوسين
أسامر الضيقة وادندن عذابي
وإن قلت لك عانيت منك الأمرّين
تضحك علي .. وتقول خلك شبابي