لي مدتن ضايق على كل الأحـوال
وارجيك يامنشي بروق المخاييـل

الهم والهاجـوس والضيـم قتـال
والضيق صاير من كبار الغرابيـل

صار الحزن موجود بلوان واشكال
وصار العنا بالحيل ثم طيح الحيـل

واصبحت اقلبها على كـل مدخـال
لكن على قلبي تضيـق المداخيـل

ياصاحبي وش فيك خابرك رجـال
ترسي على ركابة الجيش والخيـل

خابرك في كـل المواقيـف خيـال
ياللي على الوقفات زارع محاصيل

واليوم همك هم واصبحت تختـال
والعين تذرف بالدمـوع الهماليـل

وش قصتك يامعرب الجد والخـال
يابن الرجال أهل السيوف المصاقيل

كان المواقف تبغي زحول ورجـال
خذني يمينـك ياسليـل المشاكيـل

واذا علومـك بيـن همـن ولازال
اسجد لمن نزل تبارك مـع الفيـل

واذا الدعاوي حب وافراق واوصال
وقطع حبيبك ياصحيبي المراسيـل

باقولك لو تصبـر سنيـن وليـال
الحب مايرحـم حفيـد الحلاحيـل

وهذي حقيقه مابها كـذب واجـدال
والله يعينـك فاللـيـال المقابـيـل