سلطان بن حامد

علي فلاح

مع أحداث الليالي هاجسي يستحدث الافكـار
و لا يهتـمّ فـي تركيبهـا ولاّ صياغتـهـا
أنا أشوف العرب تنظر يمين و ينظرون يسار
بعد ما دقّ ناقوس الخطـر قامـت قيامتهـا

سلطان ابن حامد

ترى الأحداث واجد وأنت شاعر والعلوم كبار
تجيب السالفه وتقول جتنـي مـن محبّتهـا
وأنا ما شفت لكن يا علي قلّي وش اللّي صار
نبى ننصر عرب وألا عرب نجرح كرامتهـا

علي فلاح

يا ليت الامر هذا عايدي مـا يلفـت الانظـار
لكنّـه يشغـل الافكـار و الانظـار يلفتـهـا
ما دام إنّ الرسول المصطفى يوصي بسابع جار
رياجيل الشهامـه لا تخلّـى عـن شهامتهـا


سلطان ابن حامد

لو إن ّ الأمر عادي ما تبّثه نشرة الأخبار
لكن ّ السالفه شعله وشبّت من شرارتهـا
أنا ماني وكيل ٍ للغشيم اللي يدق ّ الطـار
ليا منّه خبط فالارض يبلش مع مجنّتهـا

علي فلاح

ليا شبت ترى كل الفراش يطيح وسط النـار
يجيك من السماء حتى يوقّّع فـوق شعلتهـا
ما دام إنّك صحيب القوم تكشف خافي الاسرار
قبل تصدر قرارات العمل تعطيـك صورتهـا

سلطان ابن حامد

ما دام أصل الليالي دايره وأصل الفلك دوّار
نبى نرخص عمار نفوسنا ونعز ّ هيبتهـا
أنا للقوم قوماني ولا أغدر في حديد الـدار
مزّهب بندقي وأعرف متى تطرح ضريبتها

علي فلاح

ترى اللي ما يعبد الله يعبد القرش و الدينار
قروشك يالعصيمي عدّها و إفتح خزينتها !!!
ليا زهبتها حـذرا تثورهـا بـدون عيـار
على نيشانها يا زيـن نقلـة راس حبّتهـا

سلطان ابن حامد

قروشي تكفل الأيتام وتوفّـر قـرا الخطّـار
ماهيب قروشك اللّي يابن ثعلي وسط صرّتها
أنا مسلم وأحارب زمرة التكفيـر والكفّـار
لكن حذرى تجي من دونها تصبح ضحيّتها

@s_7amd