[poem=font="Simplified Arabic,6,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
سقى الغيث مرقابٍ تعليت فيه عصير=وشفت الديار اللي هجرنا منازلها
تغربت عنها لاملاله ولا تقصير=ظروف الحياة اللي حدتنا مشاكلها
تغربت قبل ادري عن الهم والتفكير=ولاجيت حتى طاعت النفس عاذلها
عرفت المنازل لو لحق بعضها تغيير=وظليت لين الشمس غابت مقابلها
على ذكرياتٍ كنها شاشة التصوير=أشاهد بها قصة حياتي من اولها
تذكرت يوم إن العرب ياردون البير=وهم في رجا نوض البروق ومخايلها
وتذكرت يوم العيد واللعب والتعشير=ولبسي ثيابٍ كانت امي تفصلها
وجيراننا اللي عايدونا وكانوا غير=وشدت ضعاينهم وعيني تخايلها
وتذكرت ذيك الكلمه اللي لها تأثير=تسلط على الخمس الحواس وتعطلها
ليا قالها من قالها صابني تخدير=ولو تسألوني قلت مانيب قايلها
سنينٍ مضت لاخوف منها ولاتحذير=كما الحلم للي عاشها ويتأملها
قبل لاتجينا لاحضارة ولا تطوير=وقبل لاتفرقنا الحياة ومشاغلها
وفكرت وليا اللي فنوا ماخذوا قطمير=يكون الثياب اللي جثثهم بداخلها
وعودت اقول إن كان ماخانني التعبير=حياةٍ وراها الموت معروف حاصلها
ترى مالك اللي تذخره من نصيب الغير=ولاتستفيد إلا همومٍ تحملها
فلا تذخر إلا طاعة الله وفعل الخير=هي اللي تقدمها وقبلك تحصلها
تعشى فتات الخبز وإلا سنام بعير=مصيرك تواجه للنهايه وتاصلها
على قولة أصحاب البلد كل فطير وطير=ورزقك على اللي كل الأرزاق كافلها
توكل عليه ويرزقك مثل رزق الطير=همومٍ حملها الناس ماهوب حاملها
مع اول شعاع النور كل الطيور تطير=ولاتظوي إلا زادها في حواصلها
وفيها لنا عبرة وفيها لنا تذكير=تخلي لبيب العقل يقعد يحللها
خساره ضياع العمر في قلة التدبير=تجمل بروحك لين ربك يجملها[/poem]