السلام عليكم ورحمة الله وبركاته

/

إلى قلوبكم الطاهره

أتت كما هي..


/


\


[poem=font="simplified arabic,5,purple,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]

انا ودعت حبٍ شايله بين الضلوع سنين=ماهو بإيدي ولكن غصب عني يوم ودعته

ظروفي ماتوافق مع ظروفه لو نعيش دنين=وجات الساعه اللي خافي المكنون طّلعته

حكايات وسوالف ناس عن تباعة المقفين=وانا من كثر ما اسمع هرجهم بالقلب سمعته

انا بأصبر على وقت الشقى لاجاء النهار الشين=والا من جا لزومي باخطل الذرعان سنعته

ولكن كيف ابا اصبر في مفارق داعج العينين=وانا اذكر يوم في حضن الغرام الشرح دلعته

ياويش الضيم من بعده ويا ويش العنى والبين=لي الله كم وكم من كاس مرٍ قد تجرعته

تشبعني غلا وابحرت به في غبة الاهين=ومن جزل القصايد مرهيٍ له لين شبعته

عطيته حب ما يوصف وفضلته على الغالين=وقلبي مارضى بمفارقه لكن قنّعته

عشقته لين قلبي صار ينطق له هلا واهلين=تملكني وانا في قمة شعوري وضيعته

زماني هز وجداني وعرض جمبي السكين=زمانٍ ما يطاوعني وانا بالغصب طاوعته

ليا من اقبل الليل اتعنى والعرب ممسين=يجيني من عنى الحرمان شيٍ ماتوقعته

خسرت اللي غرامه صورتٍ بروازها الجفنين=وباب القلب لجله بالغلا والشوق شرعته

خسرته بين تلويع الحظوظ وبين رمشة عين=ولو يرجع بغال السعر والاثمان رجعته

كتبت من القصايد والرسايل والمأسي لين=قبس جمر الفؤاد اللي بزند الشوق ولعته

يعانقني خياله واتأمل فيه لين يبين=حزن وجهي وتأثيرٍ بحالي ماتصنعته

الا يالحظ الاقشر وش تبي بمعاند الشرهين=ياكم من واحدٍ في غمرت اشواقه ولوعته

وياليتك تعرف الجافي الجاير من المسكين=عشان تشوف حال اللي بسيف الجور مزعته

عسى ذكراك ترحل ياهوى في عالم الناسين=عشان تشيل همٍ في ضميري غصب جمعته

يئست من الهوى اللي مثل ظرب السيف ابو حدين=وعزاي وجرحي الدامي بشمع الصبر شمعته

غدى قلبي مثل بيت أجوديٍ شيده من طين=وبيبانه عواصيف الرياح الهوج خلعته

رحل راعيه عن هم الهوى ومجاكر الواشين=وخلا ذكرياتٍ في زمان الحب مانفعته

عرفت انا الهوى في عالمه وحده من الثنتين=فراقٍٍ مر ولا وصلّ والعذال قاطعته

ماعاد الا انهي القصه ودمعي يسبر الخدين=يبا ينزل ولكن عزتي بالنفس مانعته...!!



[/poem]


/


أبو سحــــايب


.