[poem=font="Simplified Arabic,6,black,bold,italic" bkcolor="transparent" bkimage="" border="none,4,gray" type=0 line=0 align=center use=ex num="0,black""]
لك الله يوم اضحك ونا خافقي مخنوق=من العبره الي خانقتني وخانقها
اضمد جروحي من جروحي ونا مخلوق= على قد حالي والجزا عند خالقها
لاحب اجرح احساسك ولا اطلع قليل الذوق=ولا ابغاك تفتح صفحتي بعد مــغلقها
خطاي الوحيد احرقت دمك وهو محروق=ونا آهدي اعصابي ولاني بمحرقها
تفضل ولا تزعل وحنا نبيك اتروق= كما كنت معنا هد نفسك وروقها
خيالي وسيع اطلق عنانه وسوقه سوق= ادور فرح روح(ن) وجوده يضايقها
من المرسم المبري على الدفتر المشقوق=يجوز انتهي منها وبعدين اشققها
من ابداع فكري لا مقلد ولامسروق= علي اعتني فيها لعين امتذوقها
تفننت فيها فن والبستها بالطوق=افتح لها بيبان وابواب أغلقها
كنوز الضماير والضماير لها صندوق = ولوكنت عن مافي الصناديق فارقها
تخصك وشخصك لو قراها رفعها فوق= اذا قلت شبه امعلقه قلت علقها
مرور الكرام الشرح والطرح بالطاروق= يكفيك عن لبواب مابيك تطرقها
بداية حديثي تم والي بقا ملحوق= بتابع مسير القافله علي الحقها
سلام وتحيه ونت مالي ومالك عوق= علينا الوفا والناس ربك يوفقها
وداع الصديق الي بقا لك عليه احقوق= خذ الكلمه الي واجب انك تصدقها
تذكر بها معنى الغلا والوفا والشوق= وشمس الوصال اليا تباطيت مشرقها
كلام الصحيح وكثرة الشرح ماله سوق= ونا باتكفل بالدعايه وسوقها
عيار الذهب ثابت ولو في غلاه افروق= على كل راعي صنعه انه يطبقها[/poem]