بسم الله ..

السلام عليكم ورحمة الله وكل عام وانتم بخير

ابيات بمناسبة انتهاء سنة هجرية وبداية اخرى جعلها الله سنة خير على المسلمين اجمع ..

[poem=font="Simplified Arabic,5,darkred,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياعامنا الهجري قضيت ولا انقضى شغل العباد = كلن على همه سرى متعلقن بشدادها

راحوا ورى الدنيا يحثون الخطى بالاجتهاد = وقادتهم الغفله كذا واستسلموا لقيادها

الناس في نعمة كريمن بين شرب وبين زاد = بس البلى جوع النفوس اللي عثى باكبادها

والموت يفرس بالبريه ياصباح وياهجاد = وحوش المقابر يشتكي صديرها وورادها

يالمعتبر وش تنتظر عقب الطشاش الا الحصاد = سهيل يلمع بالسما والبيض ياعدادها

وين الشداد اهل الحجر ووين هود ووين عاد = راحت وراحت عقبها فرعونها واوتادها

ياهل العقول الراشده لاتكثرون الاعتقاد = اما ارشدوا ولا ارشدوا لاتمنعون ارشادها

المرشد اصبح موقفه لازم ولا يقبل حياد = والنصح امانه والامانه خاسر جحادها

وبيض النوايا السابقه قام يتغشلاها السواد = والشك يسعى بالنفوس ويجتهد بافسادها

الخير واجد لكن التبذير والاسراف زاد = واهل الطمع واهل الحسد قامت تسن حدادها

زاد الغلاء واهل الالاف استفرسوا هل الاحاد = واسعارنا مستسعره واحوالنا ماعادها

واهل القصيد من الغوى قامت تهيم بكل واد = انا الذي وانت الذي والصوت ياردادها

صار الشعر قلة ادب من يوم غاب الانتقاد = من عقب ماكان الاديب من العرب قصادها

والعولمة جابت لنا علمن يعله مايعاد = قامت تصدر والعرب تقطن على ميرادها

تهافت افكار الخراب الغازية مثل الجراد = على انحلال المجتمع والمرأة وسوادها

جو وقلطوا معنا غصب بآي فون وآي باد = واهل المواقع تدهر واهل الصحف باعدادها

البر يشكي للبحر والكل يملاه الفساد = واللي على الجمره قبض كلى يده وقادها

الوسم يدخل ويخلص والغيث مابل البلاد = ولا عاد ينفع هيئه الارصاد كثر ارصادها

يالله دعيتك واطلبك وانت الكريم انت الجواد = لاتاخذ الامة بفعل الجاهل من عبادها

وانك تغيث الارض واهل الارض واليك المعاد = وتحفظ بلدنا يا إلهي من حسد حسادها

وتعز حكام البلد وتدلهم سبل الرشاد = خدام بيت الله هل العوجا حصون بلادها

وتدفع عن الامة بعلمك مايحاك ومايراد = من النصارى واليهود انصارها واهوادها

ويالله بنوٍ مقدمه كنه مجاهيمن تلاد = يردم ويشعق بارقه ليا كفخ رعادها

اسبوع ديمه مستمر بلا ركود ولا هواد = لين الفياض الممحله تجود مما جادها

والبل ترعى والغنم متقاصره مامن بعاد = عم الربيع ارض الجلد واستلحقته انفادها

يالله عسى لي طلبتن عندك تعد ولا تعاد = يوم ارفع ايديني واقول الله يامدادها

انا دخيلك من تحول نعمتك والا النفاد = ماتنفد انعام الكريم ولا يقل امدادها

لكن مادام الله جعل شكره على النعمه قياد = فالحمد له باعداد خلقه والثناء باعدادها

ويالله عسى العام الجديد يحقق اهداف ومراد = وبه يجتمع شمل العرب قيادها وافرادها

هذا وصلى الله على شفيعنا يوم التناد = اللي نسير بسيرته في متنها واسنادها[/poem]





.