(سرحنا مساريح القطا) حزة الاغباش
والاول يدور شور من حضرة الثاني

انا والهجوس اللي سواة البحر لا طاش
يروع ولو غبته لولو ومرجاني!

ندور فياض ما وصلها ولا مطراش
ولا قد وطاها قبلنا هاجس انساني!

بعيدة عن اهل القنص والذود والادباش
ورى سد ذو القرنين في قرن شيطاني!

لو اني غلاق اربع ليالي طريح فراش
اعاني ولا احدن يدري بكبر ما اعاني!

حزين وسمايه غايمه والحروف عطاش
تخايل سحاب الدمع في محجر اعياني!

يا ليت الهجوس اقلام والا السحاب قماش
واسجل عليه اسمي ورسمي وعنواني

عشان ان تناثر وبله الصيب الرشراش
يحول ويخبر عني اللي تناساني!

صحيب بعد جت حاجتي في يديه انحاش
مثل نحشة الحصني من الذيب سرحاني

من اول نقصدها وها الحين صارت كاش
عسى من جحد مدات يمناي يفداني!

فدى كفي البيضا كفوف الخوي اللاش
ولو هو ولد عمي ولو هو من اخواني

تجملت به لكن ضاع الجميل بلاش
مثل ما يضيع الكحل في سود الاعياني

عيوبه من اول شوكة تعجز المنقاش
وتالي عيوبه عود شعله ودخاني!

وانا ويش ابي من صحبة الصاحب البكاش
ليا اقفى سترته وان تقفيت ذكاني!

ليا صار ما للرجل عزم ورباطة جاش
سفهته ولو يملك خزاين سليماني!

وانا الحمد لله وجهي ابيض بياض الشاش
تورثت طيبي من خوالي وجداني!