البارحة يوم حانت ساعة الضيقة = واسبورها .. يم صدرٍ ما بعد ضاقي

جتني زرافيل وايديها مطاليقة = من كل فجٍ عميقٍ داخل اعماقي

ومن قبل تقرب من الصدر وصناديقه = سليت راس القلم واسرجت الأوراقي

ما حركت قلبي اللي في معاليقه = هاقي بهقوة وجت في مستوى الهاقي

نخيت شعري ولبت لي طواريقه = تقول مفزاع زراقي .. لزراقي

أقفى على الهم لين أخلف تفاريقه = قدام صدري يضيق وتقفل أخلاقي

من فضل ربي ومن مده وتوفيقه = موهوب والموهبة من عند خلاقي

رجمٍ بغير السنع ما أبديه وأويقه = والعين ما ألدها في كل براقي

ماأقول هذا صعيب وذاك ماأطيقه = من وين ما أسج رجلي درهمت ساقي

ما هي باماني وحلمٍ صعب تحقيقه = أرضيت باللي كتبته كل الأذواقي

شعرٍ ينومس وتطرب له عشاشيقه = ابداع شاعر وفكر ومستوى راقي

أرفع من الطير يوم يزين تحليقه = وأحر من دمعةٍ في عين مشتاقي

وأمضى من السيف أبو حدين تدقيقه = وأرقّ وأزكى من الأزهار فالساقي

مير النصيب انكتب مافيه تبريقه = والله ولا القسمة اللي تقبل الباقي

لو كان حظي ما دونه حاجز يعيقه = يمديني اليوم من شعار الأطباقي