السلام عليكم ..


في مثل هالمواقف .. اشعر اني اول مرة اكتب قصيدة
لذلك هي خاطره في موقف اكبر من الشعر كله ..


[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]
يا ردّاد الخبر هات العلوم .. و ودّها بركود=الأخبار السريعه تخلف المخلوق عن طوره
لفيت بما تهيّا من مقادير الليال السود=ومقادير الليال السود منهيّه ومآموره
أعوذ من الحزن بالله .. وصدري حاوي ومردود=يفيض بمحتواه ولا امتلا عبّر عن شعوره
أدوّر للتوّجد منفذ .. وريع الكدر مقعود=ويا كثر اللي خواطرها من الأيام مكسوره
خيالي واسع و راسي ذهين وهاجسي معقود=زهمته واستدار وبان صبحه وانبلج نوره
لك الله .. والقصيده مالها حاجب عن المقصود=ولو قامت تعذّر مخطيه ماهيب معذوره
ما يثّر في حياتك يا الغلام إلاّ وفاة العود=لا صار العود من ماضي سنينه لاعب ٍ دوره
فقدت اللي بعد فقده تقول أني معه مفقود=حضر موته وأخذ منه الحياه .. وغيّب حضوره
فقدت أكبر معمّر من رياجيل الوفاء والجود=مضى بالقرن والعقدين والنعمين بشبوره
ثلاث أجيال تآخذ من ( معمّه ) علمه المحمود=مساعيه الكريمه مع جميع الناس مشكوره
بعد قالوا توفّى .. وأدخلوه بلحده الملحود=بكت عيني وأنا عيني ما تبكي غير مجبوره
وأنا مدري عليها زود وإلاّ ما عليها زود=لا شكّ الحزن لا خيّم عليها سنّ ساطوره
عداها اللوم لا قامت تصبّ من اللهود لهود=بعد سمّت محاجرها ودمعي جفّت بحوره
رحمك الله ياراع البيوت العامره والذود=رحلت وضاق بيتك .. والجمل بارك على زوره
رحمك الله يا اللي شاب ما شافوه بالمنقود=ولا خرّف على لهو الحديث وزيف ديكوره
رحمك الله يا اللي سيرته تحرم عن المقرود=ولا راحت مع النمام في لفّه وفي دوره
زكيّ النفس لا حاقد ولا جاحد ولا مجحود=على التسبيح والتهليل حتى يبس حنجوره
بعد حلّت تجاعيده وسلّت سيفها المحدود=تغشاه الزمان وسيّبه يمشي بباكوره
رحل جدّي.. بعد خلّف وخلاّني عريب جدود=وانا لولاه ما رمت الفخر في كلّ معموره
يا كبر الحزن بين أكبر عياله .. لآخر العنقود=لكنّ الحمد للمعبود في شرعه ودستوره
عسى خطوات رجلينه لبيت الله عليه شهود=وليف الصف الاول والعلوم البيض مخبوره
و عسى ربي يبيحه كل ما هبت هبوب النود=وعدد ما هزّت الغصن وعدد ما طارت طيوره
وعسى ربي يظله من رضاه بظله الممدود=ويعتق من لهيب النار يوم الصحف منشوره
تحطه داخل الفردوس الاعلى رحمة المعبود=آمين وياعساها دعوة ٍ ماهيب مدحوره
[/poem]


وسلمتوا ،،