|
صقر العروبه وباني مجدها الزاهر .. غيثٍ تبشر بخيراته براريقه
[poem=font="Simplified Arabic,5,#000000,bold,normal" bkcolor="" bkimage="" border="none,4,#400000" type=2 line=0 align=center use=ex num="0,#400000"]
لارحم ابو الفقر كمهو يمحق الخاطر =وإيقرّب الهم والهاجوس والضيقه
أشد منه بظلام الليل وأسافر =وألقاه قدامي مشمّر ذواليقه
يهز راسه ويضحك وين ياشاطر ؟=معك معك كل تغريبه وتشريقه !
لكن عسى ياالذكي ماصادنا ساهر =اللي على الخلق يامكثر تواهيقه
عشرة عمر وأنت خابرني وأنا خابر = عشنا فصول العدم وأعذب طواريقه
أعزف لك الحان في الماضي وفي الحاضر =لاونّ قلبك علي تلهب معاليقه
إن طعتني دام مالك عون ومناصر =خلك على العهد لا تخلف مواثيقه
قلت أنت يافقر لاتنهى ولا تامر =أسمع واخذ في كلام العقل تبريقه
خلاص أنا صامل في الوضع ومغامر =وإن راده الله .. حلمي طاب تحقيقه
صندوق دعم الفقارى كلهم حاضر = إلا .. صناديق للفقر وتلاحيقه
عقار تسليف جمعيات ياساتر !!= وحقوق الانسان لاهانت لها ويقه!
يعني ليالي وأنا ذابحك يالغادر = مادام لي في البلد فزعة مطاليقه
سلهم شوي وتنهد اااه .. ياماكر = ماخفت من قلت الحظ وتوافيقه
لاشك ياصاحبي مسكين ومكابر = الدرب من دونهم عوجٍ مزاليقه
وإن يسر الله قبلوك فالسرى العاطر =تبطي سنينك على طوله وتعليقه
ثم جاك دورك وجيت من الفرح طاير =أعطوك مدّة فلس مغير تذويقه
واخر مردك عليّ وحظك العاثر =أقطف زهر نبت قلبك من زماليقه
قلت إإإإيه .. حلمك علي تكفى يابو فاقر =لاتمتحني على ماء الوجه وأريقه
مادام مامنك فكه خلني أهاجر =يمكن يجي للمزاج الصلف ترويقه
ناظر .. وقال أنت وضعك مؤسف وقاهر ! =يفرض علي لو شتات الشمل ماطيقه
أعطيك هدنه قصيره والله القادر=يعطيك معطي طيوره في شواهيقه
معك ثلاثة شهور تسرّ وتجاهر =ترى هل الخير للمحتاج تعتيقه
أما عطاك الولي من مده الوافر = أروح وتروح في حفظه وتوفيقه
ولّى مسكتك معا علباك يالفاغر = ولايفكك أوباما وابو تفليقه
واليوم بادخل على الله .. ثم على النادر =زعيمنا اللي بعيدات ملاحيقه
صقر العروبه وباني مجدها الزاهر =غيثٍ تبشر بخيراته براريقه
تسلم يمينه ويسلم كفه الطاهر =دايم على الشعب راهيةٍ مغاديقه
خيره على المسلم وحتى على الكافر =في هامة العز له بصمه وتحليقه
ملك وعاهل وقايد أمة وكابر =أحبّه الله وتحبه مخاليقه
الله يديمك يا نور القلب والناظر =ويجير روحك يابو متعب من الضيقه
تفداك الارواح يامليكنا الظافر =أجر وطهور وجعلك من معاتيقه[/poem]
|