يا هاجس الشعر صرت تغيب و تبين

ما كنك اللي ملازمنـي لـك أزمـان

لو كنت مثلي تقـدّر عِشـرة سنيـن

ماكان تقسى و تنسى كل مـا كـان

كان لحضورك معي حضرة سلاطيـن

في داخلي لك وطن ياسع له أوطـان

قلي على وين رحت و جيت من وين

بين العناوين ما شفت لـك عنـوان

ليه البطا ؟ ما تعرف إن البطا شيـن

ان رحت ريّضت و اليا جيت عجـلان

خليت بيني و بينـك يقنـب البيـن

و البين صوته يروع الذيب سرحـان

تعال أخذ ما تبقى لـك معـي ديـن

يقطع حياة الشقا وقـت اللقـا حـان

ألذّ و أطيب لقـى ، لقيـا المحبّيـن

وأمرّ و أصعب فراق ، فراق الأخوان

على العموم إترك الشرهـه لبعديـن

محتاج أفضفض شوي ، الصدر مليان

ياما تفانيت مـع دنيـا الفنـا ليـن

كثرت عليّ الهموم و خاطري شـان

أصبحت سجّان و همومي مساجيـن

الصدر سجن و ظلوع الصدر قضبان

يقضي سجين الظلوع من الدهر حين

يعيش و يموت ما يعلم بـه إنسـان

سترت حالي بحالي و الستـر زيـن

وفي هالزمن ما بقى مستور ما بـان

سدّ الشفا له على خدّ الخفـا عيـن

ما تترك الغافـل ، و للحيطـه آذان

يا قرب يوم الاحد من يـوم الاثنيـن

للحي ، والا أمس يا بعده مـن الآن

لو الأمل يسكـن عيـون المساكيـن

ماشفت مسكين بات و مات جيعـان

ما كل حق ٍ يجـي بلسـان و يديـن

كم ضاع حق ٍ وراه يديـن و لسـان

مصارع النفس يبغى قسـوه و ليـن

وملاوع الدهر يبغى صبـر و ايمـان