[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]

يامضيعٍ وقتـك بجلسـات جهـال=وين المراجل ياجليـس الصعاليـك
وش ناقصك ياهافي الحظ والفـال=وراك ماتعطـي طريـقٍ يقـدَيـك
خاويت نـاسٍ ماتساويلهـا ريـال=وخيبت هقواتٍ هقوها العرب فيـك
اسمع بيوت سعود في بعض الامثال=لعلها من غفوة االنـوم تصحيـك
ترى المراجل ماهي بثوب وعقـال=ولاٌ بقرشٍ عن رجولتـك يطغيـك
لاصار منت بذيب ماينفـع المـال=لوتملك كنوزٍ عن النـاس تغنيـك
ولاكل من جاله شنب قيـل رجـال=ياكم شنب قد طاح جوف الشرابيك
الرجل بالمنطق وثقلـه والافعـال=وحذراك من مدحٍ مع البير يهفيـك
ترى الردي لو يمدحك مدح الاهوال=لارافعك مدحه ولاهـوب مرخيـك
وصحيبك اللي صحبته تشرح البال=ماهـوب خبـلٍ فاللـوازم يخليـك
اليابغيت صحيبـك معـرَب الخـال=قـرمٍ بحـزات الشدايـد يخاويـك
طلق الحجاج وللثقيـلات يشتـال=حرٍ على كسب المراجـل يباريـك
وحذراك من نقالة القيـل والقـال=احـذر يجيبـك هـرج ولاٌ يودَيـك
محدن يشيل الهرج ياكود الانـذال=اللـي هدفهـا فالمحابيـل ترميـك
وخلك حريصٍ من رديين الاعمـال=لاتامـن اللـي بالرديـات ناويـك
وأصبرعلى ميلـة زمانـك ليامـال=منته مغيَر فـي مكاتيـب واليـك
مافي يدك حيلـه علشـان تحتـال=دبرة ولي الخلـق ماهيـب بيديـك
مجلسك خلـه للرياجيـل مدهـال=لاتغلق البيبان في وجـه ناصيـك
والمجلس اللي لك من البغض يكتال=لوكثَـر الترحيـب والله يحيـيـك
مهانةٍ لوسيـق لـك فيـه فنجـال=أبعد عنه وش لك بمـن لا يدانيـك
وخلك على ربعك كما الغيث همـال=مهما يجي تقصير هـذي دناويـك
أدمح من الزلات لو الصبـر طـال=وخلك عن الهفوه طوالٍ خطاويـك
وأبديت من عندي تماثيـلٍ جـزال=نصايـحٍ فـوق المراقيـب تعليـك
والحق حق وكلمـة الحـق تنقـال=صديقك اللي بالنصايـح مصافيـك


ســـعــود طــالع الشــيبـاني[/poem]