السلام عليكم
دوكم المشاركات المتواضعة عسى تنال استحسانكم

المشاركة الأولى
وقفة مصيرية

من مبتدا إهتمام و حفظ الأخلاقي ‪=‬ يا هاجس الشعر غن بيوت نارية
لو كان ماني لبدع القاف مشتاقي ‪=‬ لكن ساقت هواجيسي طواريه
من كثر ما في البشر شافن الأحداقي ‪=‬ ما عاد ينفع يا كود ألغام شعرية
في مجتمع عايش من تحت الأنفاقي ‪=‬ اما تجيب الدواء ولا انتحارية
في ظلمته ضايع ما شاف الأشراقي ‪=‬ لو كان شمس الضحى فالجو مارية
ينزل تحت يوم غيره للعلا راقي ‪=‬ يا كيف ينسى كفاح سنين هجرية
أمجاد شيلت على همات الأعناقي ‪=‬ ولت بعد عهد جند الانكشارية
واليوم يزرع و يحصد حبر فأوراقي ‪=‬ وثقافته في زمانه خنفشارية
فيها المجامل و فيها كذب و نفاقي ‪=‬ من خادم القوم للروس الكبارية
وشلون نبغى التقدم و الجهل باقي ‪=‬ وكل اجودي يعتزي ببلاك بيريه
أقول لأهل العقل و المنزل الراقي ‪=‬ ماني طبيب التخلف واستشاريه
لكن ناخذ بحكمة رجل له ذاقي ‪=‬ عمر أبو حفص سيرة حق مقرية
من دون الاسلام تبقى فالعنا شاقي ‪=‬ وفي اتباع الهدى عز وفخرية
هاذي خلاصة تجارب تتعب الساقي ‪=‬ ما قيلت الا بعد وقفة مصيرية
واللي على مرقده للحين ما فاقي ‪=‬ لعله بقنبله في الحرب ذرية

المشاركة الثانية
بنجرتها

يا سعد قلبي منول كان فاضي ‪=‬ قدم عيني شافت اللي قابلتها
من بعدها يا عضيدي صرت قاضي ‪=‬ كلها بأسباب والله سلهمتها
الهنوف اللي ترزز بالفياضي ‪=‬ من عذاب الضيق تشكي خاصرتها
مثل ريم مهددة بالأنقراضي ‪=‬ البنادق لو تزهب جفلتها
كاملة من زينها وامن البياضي ‪=‬ كل الأرقام الجديدة حطمتها
وجنتيها في ظلام الليل تاضي ‪=‬ كم ليلة من بهاها نورتها
لو يجي للزين فالأيام قاضي ‪=‬ قال ما تسوى العذارى بنجرتها
حكم ما ينقض بحجة وأعتراضي ‪=‬ والنتيجة فالنهاية زعلتها
أشهد أن القلب منها فيه لاضي‪ = ‬بعد نار الشوق فيني شعلتها
والفجاج اللي وسيعات عراضي ‪=‬ في محاجر مقلتيها صغرتها
هيه ياللي صابني منك شواظي ‪=‬ عالجي نفسي وحلي مشكلتها
لازم أني فالنهاية عنك راضي ‪=‬ وما تخبى من جروحي خابرتها

المشاركة الثالثة
على اللمس

الله على اللي بأرفع الأوسمة فاز = معه التعامل بالأصابع على اللمس
أحدث فنون التقنية وأخر طراز = إعلان سعره فالجرايد نشر أمس
غالي ثمن مشراه مهوب يراز = يشريه من لا يحسب حساب للخمس
عز الطلب مضمون في شكله إعجاز = ما فيه من عيب الصناعة ولا رمس
فل أوبشن الأوصاف ما شي يعتاز = حتى الفخامة حاز ميزاتها الخمس
هيبة حضور ونظرة كلها ألغاز = مع قو عزم وإتزان وجلى عمس
خشمه عكف في طلته يشبه الباز = من يغمس المخلاب في صيدته غمس
رسمي ظهور بندرة اللون يمتاز = لونه كما بن حرق لونه الحمس
محفوظ ما جا في جهازه تلعواز = إليا اشتغل حس اشتغاله تقل همس
ضد المساري جهزوا شمعته غاز = لا هود الليل اسطعت كنها الشمس
من سيف جده لا مشى عصير ثم ماز = الساحل الشرقي على ضفته يمس
الرنج روفر للمهمات نجاز = لو كان ما ودي بكذا ازعل الجمس
منوة خفوقي كان جا لز وملاز = إليا على الطارة رست قبضة الخمس

سلمان بن مزيبن

sal7774@hotmail.com