..
.

رحم الله ابو خالد واسكنه فسيح جناته .



لاعادك الله يالصباح اللي حصل فيه الصباح
الفاجعه سلت على بيض القلوب حرابها

صحيت مع صوتٍ يناديني ترى سلطان راح
قدام تكشف طلة الصبح البهيج حجابها

والعلم وقعه في الضمير أشد من وقع الرماح
الساعه اللي جابته ليت القدر ماجابها

مكسور والهاجس سوات الطير مكسورالجناح
كن القوافي سكرت قدام وجهه بابها

على مطيحك ياعلمنا كل دمع العين طاح
والله يعوض المملكة في فقدها ومصابها

الحزن مع فرقاك كنه في عواتقنا وشاح
ماعاد للافراح داعي لو يطول غيابها

صدورنا ماعاد تدري بالسعه والانشراح
وعيوننا لامرت الذكرى تبل اهدابها

يبكي عليك اللي عليك اسند همومه واستراح
وعين تشوف بك العوض من عقب فقد احبابها

وشعب بعدك اوجاع وجراحً ماهي بـ ايا جراح
ودارً سماها يشتكي لسهولها وهضابها

والعهد ياراع الولايه والهدايه والصلاح
والطيب كله والعلوم الطيبة واصحابها

والجيش وجنود الحرابه والذخيرة والسلاح
والرايه اللي فالعلا تومي على مرقابها

ويبكي عليك الفعل والميقاف والحزم البراح
في ساعة مايحسم اليوم الكبير الا بها

ياللي سنينك للبلاد انجاز وايامك كفاح
ليت المنايا مهلت لك ماخذتك أسبابها

عسى البقا في راس زيزوم الوغا طير الفلاح
مليكنا اللي قدمه الدنيا تلين صعابها

*الله يبارك فيه ويكلل جهوده بالنجاح
والعافيه طول الزمن تضفي عليه ثيابها



..