[poem=font="Simplified Arabic,5,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
أغرب خبر حاجة التجار لاموال المساكين=واغرب منه فزعة المسكين لأصحاب التجارة
التاجر اللي من اصحاب الاراضي والبساتين=يبغى المساكين تفزع له وتبني له عماره
ياناس سيف الحيا مايقطع إلا في الحشيمين=تكفون لايرخص المعروف ويقل إعتباره
سيف الحيا سيف ظالم ماعدل مابين الإثنين=هذا يبا النعم والثاني مسويها شطاره
لوكان يجمع كنوز الأرض ما تملا له العين=إن مانهب من حقوق الناس يحسبها خساره
ياشين حظ البخيل وعلته من طبعه الشين=المال في خزنته والفقر ساكن وسط داره
لوكان يسكن بقصر وبيت جيرانه من الطين=مايعزم إلا ليا صار العشا في بيت جاره
ياالآدمي لايضيع العمر لادنيا ولادين=دنياك لابد حاليها تخالطه المراره
لاتنخدع بالمظاهر والعماير والملايين=ماداخلٍ معك في قبرك رصيد ولا عماره
إن كان حصلت مايكفيك شر الفقر والدين=إقنع ترى الرزق مايقضي عليه إلا إحتقاره
مالك من المال غير اللي ذخرته للموازين=تلقاه في يوم لامالٍ يفيد ولا أماره
وإلا ثيابٍ وزادٍ تشتريه من الدكاكين=مدة حياتك وباقي المال للوارث مداره
كم واحدٍ لمها واقفى وطشوها الشياطين=ماكل من يزرع البستان ياكل من ثماره[/poem]